Магілёўскі ліцэіст Уладзіслаў Палічэнка заваяваў бронзу на міжнароднай алімпіядзе па біялогіі

Ліцэіст Магілёўскага дзяржаўнага абласнога ліцэя № 3 Уладзіслаў Палічэнка заваяваў бронзу на міжнароднай біялагічнай алімпіядзе (International Biology Olympiad-IBO). Спаборніцтва завяршылася 21 ліпеня ў горадзе Сегед (Венгрыя), паведамілі ў прэс-службе БДУ.

Беларусь таксама на алімпіядзе прадставілі яшчэ тры школьнікі. З іх сярэбраным прызёрам стаў Даніэль Трухан (гімназія № 18 Мінска), а бронзавыя ўзнагароды ў Кацярыны Камінскай (гімназія № 10, Мінск) і Антона Кацубы (ліцэй БДУ).

Кіраўнікамі нацыянальнай каманды выступілі выкладчыкі біялагічнага факультэта БДУ дацэнт кафедры агульнай экалогіі і методыкі выкладання біялогіі Аксана Несцерава і навуковы супрацоўнік НДЛ біятэхналогіі кафедры мікрабіялогіі Сяргей Галенчанка.

Юныя біёлагі спаборнічалі ў двух турах: тэарэтычным і практычным. Вучні прайшлі тэст і выканалі чатыры лабараторныя работы з вобласці клетачнай і малекулярнай біялогіі, анатоміі і фізіялогіі раслін, анатоміі і фізіялогіі жывёл і чалавека, эталогіі, генетыкі, эвалюцыі, экалогіі і біясістэматыкі.

Усяго сёлета ў алімпіядзе прыняло ўдзел каля 300 школьнікаў з 75 краін.

Наступная Міжнародная біялагічная алімпіяда пройдзе ў горадзе Нагасакі (Японія).

Фотаздымкі - БДУ