Магілёўскі метадычны цэнтр народнай творчасці і культурна-асветнай працы 22 лістапада правядзе мерапрыемствы да 80-годдзя з дня ўтварэння. Пра гэта паведамілі ва ўстанове культуры.

Урачыстасці пачнуцца са свята на плошчы перад цэнтрам. У 10.00 тут выступяць творчыя калектывы – народныя ансамблі народнай песні раёнаў Магілёўскай вобласці. Будуць працаваць гандлёвыя пляцоўкі ААТ «Булачна-кандытарская кампанія “Дамачай”», тэматычная экспазіцыя вырабаў майстроў дэкаратыўна-прыкладнога мастацтва рэгіёна.

У 12.30 пачнецца міжнародная канферэнцыя «Каштоўнасці традыцыйнай культуры ў кантэксце захавання нацыянальна-культурнай ідэнтычнасці».

У фае цэнтра разгорнецца выстава «З крыніц народных», на якой будуць прадстаўлены традыцыйныя народныя касцюмы Магілёўшчыны, ручнікі магілёўскага Падняпроўя. Тут жа арганізуюць фотавыставу «Погляд праз 80-гадавую гісторыю».

У 14.00 выступіць народны ансамбль народнай музыкі «Магілёўцы», а ў 14.30 адбудзецца дэфіле-паказ калекцыі касцюмаў узорнай студыі мастацкай творчасці «Чарадзейка», навучэнцаў ДУА «Дзіцячая школа мастацкіх рамёстваў і мастацтваў г. Быхава».

Асноўнае мерапрыемства «Жывая нітка традыцый Магілёўшчыны» пачнецца ў 15.00 на сцэне канцэртнай залы. У праграме прымуць удзел найлепшыя аматарскія калектывы Прыдняпроўскага краю, майстры сцэны, прафесійныя артысты Беларусі і Расіі.