Рус Бел Eng 中文

Мастакі з сямі краін прымуць удзел у пленэры па жывапісе «Вобраз Радзімы ў выяўленчым мастацтве»

XXIV Міжнародны пленэр па жывапісе «Вобраз Радзімы ў выяўленчым мастацтве», прысвечаны Году малой радзімы, пачне працу ў верасні. Пра гэта паведамілі ва ўпраўленні культуры Магілёўскага аблвыканкама.

Першая частка беларуска-расійскага праекта пройдзе на тэрыторыі Тульскай вобласці. З 9 верасня беларускі склад мастакоў адправіцца працаваць у Дзяржаўны мемарыяльны гісторыка-мастацкі і прыродны музей-запаведнік Васіля Паленава. «Адкрываць пленэр на расійскай зямлі стала добрай традыцыяй, – заўважылі суразмоўцы. – Праграма знаходжання будзе насычанай. Акрамя працы на тэрыторыі музея-запаведніка, плануюцца творчыя паездкі для напісання твораў і эцюдаў па ваколіцах».

А 19 верасня мастакоў будзе сустракаць Магілёўская вобласць. Плануецца, што да беларускіх майстроў пэндзля далучацца таленавітыя жывапісцы з Казахстана, Расіі, Украіны, Афганістана, Узбекістана, Рэспублікі Карэя.

Падарожжа па Прыдняпроўскім краі творчыя браты пачнуць з аграгарадка Княжыцы Магілёўскага раёна. Праграмай таксама прадугледжана наведванне Александрыі Шклоўскага раёна. Ва ўпраўленні культуры звярнулі ўвагу, што госці змогуць не толькі пазнаёміцца з прыродай, архітэктурай, мясцовымі жыхарамі, але і ўліцца ў гісторыю пленэрнага руху. Запланаваны майстар-класы, творчыя сустрэчы, вечары нацыянальных культур. Прадугледжана шырокая культурная праграма, якая ўключае пешаходную экскурсію па абласным цэнтры, знаёмства з музеямі горада, мемарыяльным комплексам «Буйніцкае поле».

Па выніках пленэру 27 верасня ў Магілёўскім абласным мастацкім музеі імя П. В. Масленікава адкрыецца выстава «Вобраз Радзімы ў выяўленчым мастацтве». Сюды ўвойдуць найлепшыя карціны кожнага аўтара.

Пленэрны рух зарадзіўся ў Магілёўскай вобласці ў 1996 годзе. З таго часу пленэры сталі традыцыйнымі і прысвячаюцца вядомым мастакам Прыдняпроўскага краю, мастацтвазнаўцам, знамянальным падзеям. За гэты час у фонды абласнога мастацкага музея паступіла каля 2 тыс. твораў сучасных мастакоў.

Арганізатарамі міжнароднага пленэру выступаюць Магілёўскі аблвыканкам, Дзяржаўны мемарыяльны гісторыка-мастацкі і прыродны музей-запаведнік В. Д. Паленава, Магілёўскі абласны мастацкі музей імя П. В. Масленікава.

БЕЛТА

 

Пры выкарыстанні матэрыялаў актыўная гіперспасылка на mogilev-region.gov.by абавязковая