Матдапамогу ў памеры Br6 тыс. пералічыў прафсаюз аховы здароўя медустановам Магілёўскай вобласці

Рэспубліканскі камітэт Беларускага прафсаюза работнікаў аховы здароўя пералічыў медыцынскім установам Магілёўскай вобласці Br6 тыс. Пра гэта расказаў старшыня абласной арганізацыі галіновага прафсаюза Віктар Суслаў.

«Гэта мэтавыя грошы, якія пайшлі на набыццё сродкаў дэзынфекцыі для рэгулярнай апрацоўкі рабочых месцаў і памяшканняў агульнага карыстання, а таксама на закупку сродкаў індывідуальнай абароны – аднаразовых пальчатак, масак, бахіл, медыцынскіх халатаў, – адзначыў суразмоўца. – Гэта пасільная дапамога нашым людзям і, упэўнены, у эпідэміялагічнай сітуацыі яна не лішняя».

Больш за ўсё прафсаюзамі выдзелена сродкаў інфекцыйнай бальніцы – Br3 тыс., па Br1 тыс. атрымалі абласны супрацьтуберкулёзны і скурна-венералагічны дыспансеры, а таксама Магілёўская бальніца № 1. На сёння гэта разавая дапамога, аднак пры неабходнасці прафсаюз будзе шукаць магчымасці для падтрымкі работнікаў сферы аховы здароўя. 

Не засталіся без увагі і былыя медыцынскія работнікі рэгіёна: у асобе прафсаюза яны знайшлі падтрымку і дапамогу ў куплі і дастаўцы на дом неабходных прадуктаў і лекавых сродкаў.

Віктар Суслаў таксама звярнуў увагу на тое, што Федэрацыя прафсаюзаў Беларусі прыняла рашэнне аб страхаванні і матэрыяльнай падтрымцы медыкаў. Гаворка ідзе пра работнікаў устаноў аховы здароўя, якія аказваюць дапамогу хворым з каранавірусам.

«Сітуацыя, якая склалася, – гэта выклік усяму грамадству, які патрабуе максімальна зладжаных дзеянняў, прызнання адказнасці не толькі за сваё здароўе, але і за здароўе навакольных, – падкрэсліў Віктар Суслаў. – Мы надалей будзем аказваць падтрымку і выказваць сваю салідарнасць медыцынскаму персаналу, на чые плечы ў гэтай нялёгкай эпідэміялагічнай сітуацыі лёг груз вялікай сацыяльнай адказнасці».

Ён заўважыў, што на адрас прафсаюза ўжо паступаюць звароты ад фізічных і юрыдычных асоб, якія прапануюць аказаць бязвыплатную дапамогу медустановам рэгіёна. Напрыклад, па падрыхтоўцы і дастаўцы бясплатнага харчавання для супрацоўнікаў бальніц, у якіх праходзяць лячэнне пацыенты з каранавіруснай інфекцыяй.