На выставе «СМІ ў Беларусі» будзе прадстаўлена больш за 50 экспанентаў

На ХХІІ Міжнароднай спецыялізаванай выставе «СМІ ў Беларусі» будзе прадстаўлена больш за 50 экспанентаў, паведаміў на прэс-канферэнцыі міністр інфармацыі Аляксандр Карлюкевіч.

«Выстава адкрыецца 2 мая ў 12.00. На ёй будзе прадстаўлена больш за 50 экспанентаў. Па традыцыі шырока будуць паказаны друкаваныя і электронныя СМІ, а таксама сеткавыя выданні, якія пачалі рэгістравацца ў нашай краіне згодна новаўвядзенню ў заканадаўства з 1 снежня 2018 года. На выставе будуць прэзентаваны такія сеткавыя выданні, як MogilevNews.by інфармацыйнага агенцтва «Магілёўскія ведамасці»; Ng-press.by, заснаванае рэдакцыяй «Настаўніцкая газета; Mediana.by, рэдакцыяй якога выступае вытворча-выдавецкае РУП «Дом прэсы», – адзначыў міністр. – Шмат мерапрыемстваў будзе прысвечана рэгіянальным сродкам масавай інфармацыі, якія раскажуць аб удзеле ў сацыяльна-эканамічным развіцці сваіх рэгіёнаў. Адбудзецца прэзентацыя спартыўных выданняў. Мы вельмі ўдзячныя ўсім журналістам, якія асвятляюць спартыўную праблематыку, за тое, што яны падчас выставы прадэманструюць свае творчыя праекты, што асабліва важна напярэдадні ІІ Еўрапейскіх гульняў. Вялікае месца ў праграме выставы адведзена праектам БелТА, прэс-службаў і камунікацыйных агенцтваў».

Паводле слоў Аляксандра Карлюкевіча, на выставе «СМІ ў Беларусі» будуць прадстаўлены сродкі масавай інфармацыі іншых краін. «Заяўлены СМІ нашых суайчыннікаў за мяжой. Ёсць асобны стэнд, які мы падрыхтавалі разам з Упаўнаважаным па справах рэлігій і нацыянальнасцей, які называецца «СМІ дыяспар». На ім будуць прадстаўлены краіны Балтыі, Украіна, Расія. Прыедзе таксама дэлегацыя з Узбекістана, а з дапамогай пасольства Кітая ў Беларусі пазнаёмім з кітайскімі СМІ», – сказаў ён.

Выстава «СМІ ў Беларусі» будзе звязана і з іншымі медыйнымі мерапрыемствамі. «У маі ў Салігорску і Слуцку пройдзе рэспубліканскі семінар, прысвечаны рэгіянальным сродкам масавай інфармацыі, а ў другой палове месяца адбудзецца чарговы міжнародны медыяфорум», – анансаваў Аляксандр Карлюкевіч.

ХХІІ Міжнародная спецыялізаваная выстава «СМІ ў Беларусі» пройдзе з 2 па 4 мая ў адміністрацыйным комплексе па праспекце Пераможцаў, 14. Чакаецца ўдзел не менш за 100 экспанентаў, якія прадстаўляюць каля 500 друкаваных сродкаў масавай інфармацыі, тэле- і радыёпраграм і каналаў з Беларусі, Расіі, КНР, Балгарыі, Літвы, Азербайджана, Украіны, Латвіі, Індыі, Германіі, Турцыі, Грузіі і іншых краін. Агульная плошча выставачнай экспазіцыі складзе больш за 1 тыс. кв. м.

Наведвальнікам выставы будзе прапанавана насычаная праграма мерапрыемстваў, якая складаецца з прэзентацый інфармацыйных і інтэрнэт-праектаў, аўтограф-сесій, майстар-класаў. Кіраўнікі сродкаў масавай інфармацыі і журналісты, прадстаўнікі экспертнай супольнасці абмяркуюць значныя пытанні функцыянавання медыясферы, ролі СМІ ў развіцці грамадства і дзяржавы ў межах дзелавой праграмы.

Міжнародная спецыялізаваная выстава «СМІ ў Беларусі» праводзіцца штогод з 1997 года Міністэрствам інфармацыі пры падтрымцы Міністэрства замежных спраў, Мінскага гарвыканкама, РУП «Нацыянальны выставачны цэнтр “Белэкспа”», іншых органаў дзяржкіравання, вядучых СМІ, грамадскіх арганізацый.

БЕЛТА