Новая школа ў мікрараёне Казіміраўка Магілёва расчыніць дзверы 1 верасня

Новая школа ў мікрараёне Казіміраўка Магілёва расчыніць дзверы 1 верасня. Сацыяльна значны аб’ект на паўгода раней здадуць спецыялісты найбуйнейшай магілёўскай арганізацыі – ААТ «Будаўнічы трэст № 12».

Будынак узвялі на працягу года. На аб’екце працавала больш за 300 чалавек. «Школу плануем увесці не ў сакавіку 2020 года, а 1 верасня – на паўгода раней за тэрмін. Не таму, што мы так хочам, а таму, што так трэба: дзеткі павінны пачаць навучальны год своечасова, у светлых прасторных класах», –адзначыў генеральны дырэктар будаўнічага трэста Дзмітрый Марозаў.

Кіраўнік арганізацыі таксама заўважыў, што ўвод новай школы ў эксплуатацыю дазволіць разгрузіць мікрараён Спадарожнік, таксама будуць створаны новыя працоўныя месцы. Ужо пададзена каля 600 заяў на навучанне ад бацькоў, сфарміравана і набрана 7 першых класаў. Усяго навучальная ўстанова гатова прыняць 1 020 школьнікаў.

Па матэрыяле сайта mogilev.1prof.by