Новы малочна-таварны комплекс у Кіраўскім раёне будзе ацяпляцца біягазам

У ААТ «Рассвет ім. К. П. Арлоўскага» Кіраўскага раёна Магілёўскай вобласці ў сакавіку бягучага года ўвядуць у эксплуатацыю буйны малочна-таварны комплекс. Пра гэта паведаміў дырэктар гаспадаркі Аляксандр Багель.

Асаблівасць гэтага праекта ў тым, што аб’ект будуецца на тэрыторыі ААТ побач з дзеючай біягазавай устаноўкай. Ацяпленне комплексу і падагрэў гарачай вады будзе забяспечвацца дзякуючы аднаўляльным крыніцам энергіі, што прынясе значны эканамічны эфект за кошт выкарыстання танных энергарэсурсаў. Комплекс будзе абсталяваны спецыяльнай помпавай устаноўкай, каб напрамую перапампоўваць гной (біяадходы) у рэактары біягазавай устаноўкі. Узамен аб’ект атрымае неабходную колькасць цяпла для ацяплення памяшканняў і падагрэву вады.

Комплекс разлічаны на ўтрыманне 772 кароў і 270 цялят. Першае памяшканне для дойнага статка ўжо ўведзена ў эксплуатацыю і ўкамплектавана ўласным пагалоўем. На фінішы завяршэнне будаўніцтва другога хлява для кароў і цялятніка для індывідуальнага ўтрымання да 3 месяцаў маладняку. Для захоўвання сенажу і сіласу пабудаваны тры сіласныя ямы, а таксама склад для захоўвання грубых кармоў. Зроблены дзве артэзіянскія свідравіны і ўзведзена воданапорная вежа для забеспячэння комплексу тэхнічнай і пітной вадой.

Тут ужо пачалі атрымліваць аддачу ад аб’екта. Штодня вырабляецца 6 т малака класа «экстра». А з даўкамплектацыяй малочным пагалоўем і выхадам на праектную магутнасць плануецца павялічыць выпуск прадукцыі больш чым у 2 разы. Гэта дазволіць нарасціць у цэлым па гаспадарцы выпуск малака больш чым на 40%. «Для нас сёння гэта высокаліквідная прадукцыя з дастаткова высокай дабаўленай вартасцю – рэнтабельнасць рэалізацыі малака за студзень–лістапад мінулага года склала 35,2%, а ў новым комплексе за кошт эканоміі энергарэсурсаў яна будзе яшчэ вышэйшай. Гэта дазволіць атрымліваць дадатковыя даходы і накіроўваць іх на развіццё вытворчасці і сацыяльнай сферы, матэрыяльнае заахвочванне работнікаў», – падкрэсліў Аляксандр Багель.

У сакавіку плануюць завяршыць асноўныя будаўнічыя работы і пачаць укамплектаванне другога хлява малочным пагалоўем, а таксама завяршыць добраўпарадкаванне тэрыторыі. Выйсці на праектную магутнасць – 16 т малака за суткі –у новым комплексе плануюць у канцы бягучага года. У рэалізацыю праекта ў цэлым будзе інвеставана больш Вг10 млн. гаспадарка вядзе сваю гісторыю з 1931 года, рэарганізавана ў ААТ на падставе рашэння агульнага сходу членаў СВК ««Рассвет» імя К. П. Арлоўскага» у 2016 годзе. У валавым аб’ёме вытворчасці сельгаспрадукцыі ў Кіраўскім раёне «Рассвет» займае больш за 30%.

БЕЛТА