Новы рэнтгеналагічны апарат пачаў працаваць у Магілёўскім гарадскім траўмапункце. Ён стаў заменай больш старой мадэлі, якая рабіла здымкі яшчэ на плёнцы.

«Наш траўмапункт–адзіны ў горадзе. Мы абслугоўваем не толькі жыхароў абласнога цэнтра, але і Магілёўскага раёна, –адзначыў загадчык рэнтгеналагічнага аддзялення Антон Шарамкоў. – Вялікі наплыў пацыентаў. Рэнтгеналагічны апарат, які быў усталяваны ва ўстанове яшчэ ў ліпені 2002 года, састарэў і патрабаваў замены. Новы апарат «Космас-535» больш хуткі і сучасны. Час знаходжання пацыента ў кабінеце скараціўся. Акрамя гэтага, здымкі цяпер робяцца ў лічбавым фармаце. Гэта дае магчымасць трохі карэктаваць або маштабаваць малюнак. Яркая і выразная карцінка адразу загружаецца ў сетку цэнтральнай паліклінікі, да якой мы адносімся. Так любы доктар на месцы можа паглядзець здымак пацыента».

Гэты рэнтген-апарат за суткі можа рабіць каля 250 здымкаў. На старым абсталяванні атрымлівалася каля 120. Акрамя медыцынскага абсталявання, у кабінетах траўмапункта замянілі камп’ютарную тэхніку і маніторы.

У найбліжэйшы час такі ж апарат усталююць у Магілёўскай паліклініцы № 7. Яго кошт амаль Br161 тыс.

БЕЛТА