Пенсіі ў жніўні выплацяць датэрмінова – Мінпрацы

Выплата пенсій у жніўні будзе праведзена датэрмінова, –паведамілі ў Міністэрстве працы і сацыяльнай абароны.

У ведамстве ўдакладнілі, што гэта зроблена для «стварэння пенсіянерам зручных умоў атрымання пенсій: мінімізацыі паездак, скарачэння сацыяльных кантактаў».

Згодна з заканадаўствам, пенсіі выплачваюцца ў перыяд з 5 па 25 чысло на падставе графікаў выплат праз банкі, паштовыя аддзяленні, прадпрыемствы па дастаўцы пенсій.

У жніўні пенсіі, якія, згодна з графікам выплат, прыпадаюць на 10 чысло і пазней, будуць даступныя да выплаты: на пошце і праз даставачныя прадпрыемствы – з 3 жніўня, праз банкі – з 5 жніўня.

Чалавек сам можа выбіраць –скарыстацца правам датэрміновага атрымання пенсіі або зрабіць гэта ў звыклы тэрмін.

Раней у адпаведнасці з Указам Прэзідэнта №232 «Аб павышэнні пенсій» з 1 ліпеня ў Беларусі праведзены пераразлік усіх працоўных пенсій –па ўзросце, за выслугу гадоў, па інваліднасці, з нагоды страты карміцеля. Усяго на выплату пенсій у 2020 годзе будзе накіравана больш за Br13,4 млрд, у тым ліку на пераразлік па гэтым указе – Br335 млн.

БЕЛТА