Пераможцам Алімпійскага ўрока стала каманда беларускай біятланісткі Дзінары Алімбекавай

Пераможцам Алімпійскага ўрока «Веданне – сіла!», які прайшоў у НАК Беларусі, стала каманда «Майстры» беларускай алімпійскай чэмпіёнкі-2018 па біятлоне Дзінары Алімбекавай, паведамілі ў прэс-службе Нацыянальнага алімпійскага камітэта.

«Майстры» атрымалі ад суддзяў 35 балаў. На другім месцы размясцілася зборная «Весляры» пад кіраўніцтвам пяціразовай чэмпіёнкі свету па веславанні Марыны Ліцвінчук (31). Трэцяе месца заняла каманда «Лідар», якую ўзначальваў алімпійскі чэмпіён па веславанні на каноэ Аляксандр Багдановіч (31).

Алімпійскі ўрок сёлета прайшоў у незвычайным фармаце: удзельнікі мерапрыемства змагаліся за перамогу ў інтэлектуальным турніры. Навучэнцы мінскіх школ і беларускія спартсмены былі падзелены на 15 каманд. Пытанні тычыліся алімпійскага руху і ролі беларусаў у ім.

Турнір праводзіўся ў сем тураў, кожны з якіх складаўся з сямі пытанняў. За правільны адказ на пытанне ў першых шасці турах налічваўся адзін бал. У выпадку няправільнага адказу балы не налічваліся. Апошні, сёмы тур, бліц-апытанне, праводзіўся па асаблівых правілах.

Усе вучні, якія прынялі ўдзел ва ўроку, атрымалі Алімпійскія дзённікі, якія спецыяльна распрацаваны НАК Беларусі пры падтрымцы Мінадукацыі да новага навучальнага года.

Тэкст – БЕЛТА

Фота - noc.by