Раённы фестываль народнай творчасці і рамёстваў «Глушанскі хутарок» пройдзе 4-5 кастрычніка ў Бабруйскім раёне

Раённы фестываль народнай творчасці і рамёстваў «Глушанскі хутарок» пройдзе 4-5 кастрычніка ў пасёлку Глуша Бабруйскага раёна. Пра гэта паведамілі ў Магілёўскім абласным метадычным цэнтры народнай творчасці і культурна-асветнай працы.

Старт мерапрыемству дасць пленэр па кераміцы і ганчарстве, паколькі Глуша знакамітая развіццём і адраджэннем гэтага традыцыйнага промыслу. Летась падчас фестывалю тут адкрылі ганчарны двор. Да гэтага часу ў пасёлку быў толькі ганчарны клас, але ў развіцці і папулярызацыі традыцыйнага для мястэчка рамяства вырашылі ісці далей. Пад гэта прыстасавалі прасторны вясковы дом, дзе размясцілі неабходны інвентар і абсталяванне. Ён стаў і майстэрняй, і музеем адначасова, дзе любому жадаючаму раскажуць пра гісторыю ганчарства, пакажуць працэс вырабу традыцыйнай керамікі: ад падрыхтоўкі гліны да яе абпалу.

У другі дзень на тэматычных падворках будзе гучаць музыка, будуць праводзіцца традыцыйныя абрады, гульні, конкурсы і сельскія забавы. Запланавана праца выстаў-кірмашоў вырабаў майстроў дэкаратыўна-прыкладной творчасці, прадукцыі аграсядзіб і асабістых падсобных гаспадарак, дэгустацыя страў беларускай нацыянальнай кухні. На пляцоўцы свята прэзентуюць мясцовае конна-спартыўнае свята «Конная фіеста» і свята бульбы, а для юных наведвальнікаў будуць адкрытыя дзіцячыя пляцоўкі і атракцыёны.

На галоўнай сцэне падтрымаюць святочны настрой раённыя калектывы мастацкай самадзейнасці. Тут жа пройдзе традыцыйны раённы конкурс беларускай песні «Люблю цябе, Белая Русь». Выберуць падчас фестывалю і гаспадыню Глушанскага хутарка.