Развіццё сельскіх тэрыторый Магілёўскай вобласці абмяркуюць на форуме ў Клічаве

Рэгіянальны форум «Умацаванне міжсектаральнага ўзаемадзеяння для лакалізацыі мэтаў у галіне ўстойлівага развіцця і развіцця сельскіх тэрыторый» пройдзе ў Клічаве 26–27 лістапада, паведамілі ў Слаўгарадскім райвыканкаме.

Форум падвядзе вынік папярэдняга мерапрыемства, якое адбылося яшчэ ў пачатку кастрычніка. «Тады 5 раёнаў Магілёўскай вобласці праводзілі кірмаш рэгіянальных ініцыятыў. Пераможцы атрымалі фінансаванне сваіх праектаў. Пасля гэтага мы правялі вялікую працу – прааналізавалі эфектыўнасць такіх праектаў, разгледзелі праблемныя моманты занятасці і самазанятасці насельніцтва ў малых гарадах вобласці. Зараз неабходна выпрацаваць новыя падыходы і стратэгіі. Плануецца, што ўдзел у нашым мерапрыемстве прыме больш за 70 чалавек», – расказала старшыня Слаўгарадскага раённага Савета дэпутатаў Святлана Язерская.

Падчас мерапрыемства запланаваны інфармацыйна-аналітычныя і пленарныя дыскусіі, міравое кафэ для пошуку рашэнняў актуальных праблем развіцця сельскіх тэрыторый, круглыя сталы і тэматычныя пляцоўкі.

Праект рэалізуецца Слаўгарадскім раённым выканаўчым камітэтам сумесна з Клічаўскім, Быхаўскім, Краснапольскім і Чэрыкаўскім райвыканкамамі пры падтрымцы Міжнароднага фонду развіцця сельскіх тэрыторый.

БЕЛТА