У Магілёве 8 чэрвеня падчас мясцовай ініцыятывы «Горад-сад, горад-луг» пройдзе трэнінг па закладцы саду лекавых раслін як зоны падтрымкі біялагічнай разнастайнасці горада, паведамілі ў Магілёўскім дзяржаўным універсітэце імя А. А. Куляшова.

Паўдзельнічаць у трэнінгу можа кожны. Падчас мерапрыемства на тэрыторыі аграбіялагічнай станцыі «Любуж» універсітэта (старт у 9.00) будзе высаджана больш за 200 лекавых раслін (больш за 20 відаў). Удзельнікі азнаёмяцца з асаблівасцямі па іх вырошчванні і доглядзе, каб у далейшым прымяніць гэтыя веды на сваіх прысядзібных участках.

«Горад-сад, горад-луг» адраджае традыцыі гарадскога аптэкарскага агарода, які існаваў у Магілёве на тэрыторыі грамадскага саду Падніколле з першай паловы ХХ стагоддзя, і прымяняе новыя метады арганізацыі грамадскіх гарадскіх агародаў і зялёных прастор, – адзначылі ва ўніверсітэце. – Праект закліканы паказаць гараджанам, як кожны можа паўдзельнічаць у развіцці зялёных тэрыторый горада і авалодаць практычнымі навыкамі вырошчвання дэкаратыўных і лекавых раслін, арганізацыі зон падтрымкі біяразнастайнасці з выкарыстаннем мясцовых відаў раслін».

Плануецца, што з ходам часу лекавы сад будзе папаўняцца новымі раслінамі.

Грамадская ініцыятыва рэалізуецца па праекце «Камунальнае кіраванне ў гарадах – камунікацыя і кіраванне для ўключэння грамадскасці ў кіраванне гарадской гаспадаркай у Беларусі (КАМГАР)», фінансаванай Еўрапейскім саюзам. Арганізатарам выступае Магілёўскі абласны аддзел Беларускага геаграфічнага таварыства сумесна з МДУ імя А. А. Куляшова, грамадскімі аб’яднаннямі «Экапраект» і «ЭНДО» і пры падтрымцы гарвыканкама.

БЕЛТА