RU BY EN 中文
Twitter Instagram

Слаўгарадскі раён адзначыў 96 гадоў з дня ўтварэння

Слаўгарадскаму раёну – 96 гадоў. Знакавую дату Прысожскі край адзначыў 17 ліпеня.

За гэтыя гады Слаўгарадскі раён мяняў назву, аднаўляўся пасля Вялікай Айчыннай вайны, змагаўся з наступствамі аварыі на Чарнобыльскай АЭС, а ў апошнія гады дынамічна развіваецца. Тут з’яўляюцца новыя сацыяльныя аб’екты і вытворчасці. Сярод апошніх знакавых падзей – адкрыццё моста праз Сож, запуск свінакомплексу ў вёсцы Перагон, пачатак будаўніцтва дзіцячага садка, стварэнне прадпрыемствам «Чырвоны харчавік» вытворчасці ў Слаўгарадзе. Усё гэта сведчыць пра тое, што ў Прысожскага краю вялікія перспектывы, лічыць старшыня Слаўгарадскага райвыканкама Сяргей Міхалюта.

«Слаўгарадскі раён ганарыцца сваімі жыхарамі! Наколькі яны дабрадушныя і згуртаваныя, паказаў нядаўні візіт кіраўніка нашай дзяржавы. Сёлета ў нас адкрыўся новы свінагадоўчы комплекс на 24 тысячы галоў. Будзем развіваць гэты напрамак. Ёсць таксама добрыя віды на ўраджай. З адкрыццём новага моста праз Сож вырас турыстычны патэнцыял Слаўгарада. Цяпер наша жамчужына «Блакітная крыніца» закальцавалася ва ўсе маршруты Слаўгарадскага раёна», – адзначыў Сяргей Міхалюта.

Падчас святкавання 96-годдзя з дня ўтварэння раёна ўшаноўвалі ганаровых ветэранаў Слаўгарада і тых, хто ў розныя гады ўнёс значны ўклад у сацыяльна-эканамічнае развіццё рэгіёна. Узнагароды ў дзень свята атрымалі і міні-футбалісты Слаўгарадскай «Алімпіі», якія сталі сярэбранымі прызёрамі адкрытага чэмпіянату Магілёва.

«Радыё Магілёў»

Пры выкарыстанні матэрыялаў актыўная гіперспасылка на mogilev-region.gov.by абавязковая