Рус Бел Eng 中文

Славутасці Крычаўскага раёна абазначаюць QR-кодамі

Праект па абазначэнні славутасцяў Крычаўскага раёна QR-кодамі ўжо стартаваў. У парку Перамогі горада QR-кодамі абазначылі помнік воінам-інтэрнацыяналістам і памятны знак у гонар 100-годдзя ўтварэння пагранічных войскаў. Пра гэта паведаміў дырэктар ДУК «Гістарычны музей Крычава» Уладзімір Мішчанка.

Цяпер турысты могуць атрымаць гістарычную даведку, адсканаваўшы код пры дапамозе смартфона. Крычаўскія школы сталі выкарыстоўваць QR-коды для правядзення гістарычных квэстаў. Інтэрактыўныя тэхналогіі робяць больш даступнымі інфармацыю пра гісторыю Крычаўшчыны.

Таблічкі з кодам для счытвання інфармацыі размесцяць і каля іншых славутасцяў. Гэта Замкавая гара і Гарадзец, паштовая станцыя 19 стагоддзя і Свята-Мікольская царква, памятны знак – артылерыйская гармата Д-44 каля чыгуначнай станцыі ў Крычаве, помнік Мікалаю Сірацініну ў вёсцы Сакольнічы. Пазнавальную інфармацыю па кожным аб’екце падрыхтуюць супрацоўнікі Гістарычнага музея Крычава.

Як адзначыў Уладзімір Мішчанка, праект не патрабуе асаблівых укладанняў і выдаткаў. І ў той жа час прынясе карысць, будзе спрыяць папулярызацыі Крычаўшчыны, краю са сваёй багатай і ўнікальнай гісторыяй, бо Крычаў–адзін з самых старажытных гарадоў Пасожжа.

Дарэчы, менавіта гістарычны музей Крычава ўпершыню ў раёне стаў прымяняць QR-коды, пазначыўшы імі экспанаты выставачных залаў, якія выклікаюць асаблівую цікавасць наведвальнікаў. Зручнасць ацанілі турысты. Па аптычнай пазнацы яны даведаюцца аб самых яркіх фактах гісторыі горада.

«Радыё Магілёў»

 

Пры выкарыстанні матэрыялаў актыўная гіперспасылка на mogilev-region.gov.by абавязковая