Рус Бел Eng 中文

Світч-экскурсіі і кірмашы забытых кніг–магілёўскія бібліятэкі правядуць дзень адчыненых дзвярэй

Дзень адчыненых дзвярэй правядуць магілёўскія бібліятэкі 24 лютага. Пра гэта паведаміла загадчыца аддзела бібліятэчнага маркетынгу Цэнтральнай гарадской бібліятэкі імя К. Маркса Алена Шэпелева.

«У гэты дзень усіх гасцей і жыхароў горада чакае насычаная кніжная праграма. Старт дасць анлайн-адкрыццё міжнароднага інтэрнэт-конкурсу «100 натхнёных радкоў» (Казахстан – Беларусь) у бібліятэцы-філіяле № 2 імя І. Шамякіна. У гэты дзень упершыню будуць арганізаваныя літаратурныя світч-экскурсіі, дзе чытачы змогуць не толькі пазнаёміцца з бібліятэкай, але і пагуляць: развіць увагу, рэакцыю, канцэнтрацыю, даведацца нешта новае пра розныя літаратурныя падзеі»,– адзначыла Алена Шэпелева.

У гасцей мерапрыемстваў будзе магчымасць пазнаёміцца з новымі бібліятэчнымі праектамі, праграмамі і аб’яднаннямі па інтарэсах. Так, у цэнтральнай гарадской бібліятэцы імя К. Маркса адбудзецца прэзентацыя літаратурнай off / on-line студыі «Гавркія кнігі», бібліятэка-філіял № 1 імя Я. Коласа запрашае ў дзіцячую лабараторыю «Навуковыя доследы». Аматараў мультфільмаў будуць чакаць у дзіцячых бібліятэках № 2 і № 10 на мультмарафоне.

«Даведацца ўсе таямніцы прафесіі бібліятэкара можна будзе на акцыі самакіравання, якая пройдзе бібліятэках-філіялах № 4, № 9 і ў дзіцячай бібліятэцы-філіяле № 9, – расказала Алена Шэпелева. – Акрамя гэтага, мы падрыхтавалі прэзентацыю кніжных навінак, кірмаш забытых кніг, інтэрактыўныя выставы і тэматычныя фотазоны. Усё гэта будзе прадстаўлена ва ўсіх бібліятэках горада».

Насычаная праграма чакае і анлайн-карыстальнікаў. У Instagram-акаўнце @public_libraries_mogilev пройдзе розыгрыш кніжнага бокса. А на старонках @bibliot6 і @9_izmerenie адбудзецца віртуальны круіз у бібліятэку. «Прыняць удзел у фотачэленджы «Кніга твайго фармату» запрашаюць у Instagram-акаўнце db_pushkina70, а сайт дзіцячай бібліятэкі–філіяла № 9 прапануе наведаць тэматычную прэзентацыю», – адзначыла загадчыца.

У гэты дзень пройдуць розныя квэсты, майстар-класы, інтэрактыўныя гульні і многае іншае. Акрамя таго, наведвальнікі змогуць паўдзельнічаць у апытанні і анкетаванні – выказаць сваё меркаванне аб рабоце бібліятэк, падзяліцца чытацкімі інтарэсамі і перавагамі.

БЕЛТА

Пры выкарыстанні матэрыялаў актыўная гіперспасылка на mogilev-region.gov.by абавязковая