Свята народнага касцюма адбудзецца на Купалле ў Александрыі. Пра гэта паведамілі ва ўпраўленні культуры Магілёўскага аблвыканкама.

«Народны касцюм з’яўляецца найбольш яркім «індыкатарам» нацыянальнай прыналежнасці, увасабленнем паняцця аб ідэальным вобразе прадстаўніка сваёй нацыі», – падкрэслілі суразмоўцы. Кожная вобласць і горад Мінск прадставяць інтэрактыўныя тэматычныя экспазіцыі, дзе будуць паказаныя творчыя праграмы-прэзентацыі, якія адлюстроўваюць асаблівасці рэгіянальнага касцюма. Тут таксама правядуць віктарыны, конкурсы, арганізуюць народныя гульнявыя атракцыёны па тэматыцы, розыгрышы купальскіх латарэй, тэатралізаваныя дзействы з удзелам творчых груп, выступленні самадзейных калектываў.

Паміж інтэрактыўнымі пляцоўкамі абласцей размесцяцца цэнтры па народных рамёствах, дзе госці фестывалю змогуць азнаёміцца з працай найлепшых майстроў Беларусі.

Нагадаем: свята Купалле («Александрыя збірае сяброў») плануецца правесці 11–12 ліпеня ў аграгарадку Александрыя Шклоўскага раёна.