Першых слухачоў прыняў сёння адкрыты на базе Магілёўскай абласной бальніцы філіял факультэта павышэння кваліфікацыі і перападрыхтоўкі Віцебскага дзяржаўнага медыцынскага ўніверсітэта.

«Дастаткова добрая адукацыйная база бальніцы, высокая кваліфікацыя яе спецыялістаў (адзін доктар навук, 6 кандыдатаў навук), актыўная дзейнасць навукова-практычнага аддзела медустановы спрыяюць паспяховаму ўкараненню ў практыку бальніцы перадавых тэхналогій лячэння пацыентаў. Усё гэта бралася ў разлік, калі прымалася рашэнне Міністэрства аховы здароўя аб адкрыцці такога філіяла», – адзначыў яго загадчык доктар медыцынскіх навук прафесар Аляксей Марачкаў.

Навукова-практычным аддзелам бальніцы распрацаваны цыклы заняткаў па шэрагу пазіцый, якія ўяўляюць цікавасць для ўрачоў пераважна хірургічных спецыяльнасцей і анетэзіёлагаў-рэаніматолагаў.

Першыя слухачы курсаў, разлічаных на месяц, – урачы агульнай практыкі Магілёўскай вобласці. Яны пройдуць падрыхтоўку па агульнахірургічнай і неадкладнай дапамозе.

mogilevnews.by