У Магілёўскай вобласці да 2021 года з’явіцца 14 электразарадных станцый

У Магілёўскай вобласці ў найбліжэйшыя гады з’явіцца 14 электразарадных станцый. Гэта прадугледжана пастановай Савета Міністраў ад 19 верасня 2019 года № 638, якая скарэктавала пералік ЭЗС на першым этапе стварэння дзяржаўнай зараднай сеткі.

Так, да 2021 года ўключна мяркуецца стварэнне 431 ЭЗС у Мінску, абласных цэнтрах і на аўтадарогах катэгорый М і М/Е, у тым ліку ў Магілёве ўвядуць у эксплуатацыю 12 станцый і яшчэ 2 – у вобласці.

Дакумент уносіць змены ў пастанову Савета Міністраў ад 10 кастрычніка 2018 года № 731, якой зацверджана праграма стварэння дзяржаўнай зараднай сеткі для зарадкі электрамабіляў. Яна будзе рэалізоўвацца ў тры этапы. Другі этап арыентаваны на 2022-2025 гады з разліку павелічэння колькасці электрамабіляў да больш чым 10 тыс., трэці – на 2026-2030 гады (пры наяўнасці парку электратранспарту больш за 25 тыс.адзінак).

Усяго да 2030 года прадугледжана стварэнне 1304 ЭЗС, у тым ліку 1224 у населеных пунктах і 80 на ўсіх асноўных аўтамагістралях з адлегласцю паміж дзвюма найбліжэйшымі станцыямі 50-70 км. Мяркуецца таксама ўстаноўка 25 суперхуткіх электразарадных комплексаў у Мінску і гарадах абласнога падпарадкавання, на асноўных аўтамагістралях з адлегласцю паміж дзвюма найбліжэйшымі станцыямі 120-150 км.

Функцыі па стварэнні і развіцці зараднай сеткі для электрамабіляў выконвае дзяржаўны аператар – ПА «Беларуснафта». Фінансаванне праграмы прадугледжана за кошт уласных сродкаў аператара.