Рус Бел Eng 中文

У Магілёўскай вобласці ў летні перыяд плануецца аздаравіць больш за 43 тыс. дзяцей

Летняя аздараўленчая кампанія стартуе ў Магілёўскай вобласці з 1 чэрвеня. Гэтым летам плануецца аздаравіць 43,2 тыс. дзяцей, паведамілі ў галоўным упраўленні па адукацыі аблвыканкама.

Большасць дзяцей (25,7 тыс.) будзе адпачываць і аздараўляцца ў лагерах з дзённым знаходжаннем, 17,5 тыс. – з кругласутачным. У летні перыяд будзе працаваць 16 стацыянарных кругласутачных лагераў і 3 лагеры на базе санаторна-курортных арганізацый. На іх падрыхтоўку з рэспубліканскага бюджэту выдзелена Вг 58,6 тыс., з абласнога – Вг 192,1 тыс.

Лагеры з дзённым знаходжаннем будуць працаваць на базе ўстаноў агульнай сярэдняй адукацыі, дадатковай адукацыі дзяцей і моладзі, цэнтраў карэкцыйна-развіваючага навучання і рэабілітацыі. Усяго плануецца праца 540 лагераў з дзённым знаходжаннем, у тым ліку розных профіляў і напрамкаў дзейнасці. Так, у летні перыяд будуць працаваць лагеры для высокаматываваных дзяцей, якія вывучаюць замежныя мовы, матэматыку і іншыя прадметы на павышаным узроўні, лагеры сацыяльна-педагагічнага профілю сумесна з ДТСААФ, Магілёўскай дзіцячай паліклінікай №4, ДАІ УУС Магілёўскага аблвыканкама, моладзевым парламентам, АСВОД, БРСМ, Магілёўскай абласной арганізацыяй БТЧК.

Сумесна з воінскімі часцямі, МНС будуць арганізаваны лагеры абаронна-спартыўнага, ваенна-патрыятычнага профілю. Цэнтры турызму і краязнаўства возьмуцца за стварэнне перасоўных палатачных лагераў турысцка-краязнаўчага кірунку. Больш за 2 тыс. падлеткаў зможа прайсці аздараўленне і зарабіць грошы ў лагерах працы і адпачынку: працоўныя месцы для дзяцей прадастаўляюць прадпрыемствы аграпрамысловага комплексу, камунальнай і лясной гаспадаркі. Абласны кругласутачны лагер «Алімпіец» з 10 па 27 чэрвеня прыме 100 пераможцаў розных этапаў прадметных алімпіяд. Больш за 9 тыс. спартсменаў-навучэнцаў зможа працягнуць вучэбна-трэніровачны працэс у спартыўна-аздараўленчых лагерах з дзённым і кругласутачным знаходжаннем.

«Да 1 чэрвеня ўсе лагеры будуць гатовы да прыёму дзяцей. Наша асноўная задача – каб лета прайшло цікава, пазнавальна, а самае галоўнае – бяспечна», – адзначылі ў галоўным упраўленні па адукацыі аблвыканкама.

БЕЛТА

Пры выкарыстанні матэрыялаў актыўная гіперспасылка на mogilev-region.gov.by абавязковая