У Магілёўскім раёне знялі абмежавальныя меры па купанні. Пра гэта паведамілі ў Магілёўскім абласным цэнтры гігіены, эпідэміялогіі і грамадскага здароўя.

Па выніках апошніх лабараторных даследаванняў якасць вады на рацэ Днепр у аграгарадку Палыкавічы, а таксама возеры ў вёсцы Вільчыцы стабілізавалася. Узятыя пробы цалкам адпавядаюць гігіенічным нарматывам па мікрабіялагічных паказчыках.

У Магілёве знятыя абмежаванні на купанне на гарадскім пляжы ракі Днепр. У той жа час па прычыне нездавальняльнай якасці вады па-ранейшаму забаронена купанне дзяцей і дарослых на Грабянёўскім і Пячэрскім вадасховішчах.

На гарадскім пляжы па вуліцы Маладзёжнай у Слаўгарадзе таксама забаранілі купанне дзяцей і дарослых, заняткі ўсімі відамі воднага спорту. Прычына – рэгістраванне чатырох выпадкаў вострага паразітарнага захворвання – цэркарыёзу – сярод дзяцей. Гэта захворванне ў народзе называюць «Сверб купальшчыкаў». Яго можна выявіць у людзей, якія кантактавалі са стаялай або слаба праточнай вадой. «Сверб купальшчыкаў» выклікаюць цэркарыі – лічынкі плоскіх чарвякоў класа трэматод, якія паразітуюць на вадаплаўных птушках. Захворванне можа суправаджацца раздражненнем скуры, алергіі, моцным свербам, павышэннем тэмпературы цела ад 38 градусаў і вышэй.