У Магілёве падчас суботніка добраўпарадкавалі і азелянілі тэрыторыю бальніцы хуткай медыцынскай дапамогі

У Магілёве падчас суботніка добраўпарадкавалі і азелянілі тэрыторыю бальніцы хуткай медыцынскай дапамогі. Тут разам з работнікамі ўстановы аховы здароўя працавала кіраўніцтва абласнога і гарадскога выканаўчых камітэтаў, абласнога Савета дэпутатаў. Вынік старанняў, як гаворыцца, у наяўнасці: чыстыя газоны пасля ўборкі лістоты дадалі зеляніны асенняму пейзажу, а новыя туі, клёны, ліпы і хмызнякі – утульнасці і прывабнасці знешняга аблічча абноўленай радзільні. 

«Жыхары вобласці і горада чакаюць гэты аб’ект. Будаўнікі і спецыялісты запэўніваюць, што да 7 лістапада будзе ўведзены ў эксплуатацыю, – падкрэсліў кіраўнік рэгіёна Леанід Заяц. – Сёння на тэрыторыі бальніцы высаджваюцца дрэвы, хмызнякі, каб надаць спрыяльны выгляд і стварыць зялёную зону. Самаадчуванне чалавека заўсёды павінна быць на яго кантролі, але і дзяржава ўносіць вялікі ўклад у захаванне здароўя насельніцтва. Накіроўваюцца вялікія сродкі на паляпшэнне матэрыяльна-тэхнічнай базы ўстаноў аховы здароўя. І прыклад таму – сучасны радзільны дом». 

Як расказаў галоўны ўрач Магілёўскай гарадской бальніцы хуткай медыцынскай дапамогі Павел Арахоўскі, радзільны дом ХМП – гэта перынатальны цэнтр трэцяга ўзроўню, які важны не толькі для магілёўцаў, але і насельніцтва рэгіёна, паколькі тут абслугоўваюцца парадзіхі паловы раёнаў Прыдняпроўскага краю. Рэканструкцыя радзільнага дома вялася паэтапна шэсць гадоў. Будаўніча-мантажныя працы на аб’екце на этапе завяршэння. Наводзіцца парадак у памяшканнях, бляск і глянец. 

Паводле слоў галоўнага ўрача, асноўны плюс абноўленай радзільні – магчымасць улічыць негатыўныя і пазітыўныя моманты будаўніцтва папярэдніх падобных устаноў Беларусі. «Мы перанялі ўсё самае новае, сучасны вопыт і ўкаранілі яго тут», – падкрэсліў Павел Арахоўскі. Парадзіхі змогуць разлічваць на індывідуальнае вядзенне родаў, што прадугледжвае не проста ўдзел прымацаванага акушэра-гінеколага. Сама архітэктура будынка, ужытыя тут рашэнні дазволяць жанчыне знаходзіцца з сям’ёй, у чыстых пакоях, зробленых па сучасных санітарных нормах і правілах. Прыўнесены і такія новаўвядзенні ў родадапамозе, як, напрыклад, знаходжанне падчас патужнага перыяду ў джакузі. Гэта ноу-хау для Беларусі. Будзе магчымасць праводзіць любыя роды, у тым ліку партнёрскія. Пажаданні жанчын улічаць і рэалізуюць, запэўніў галоўны ўрач.

 Да канца года ўстанову аховы здароўя, разлічаную на 3,5 тыс. родаў на год, аснасцяць самым сучасным абсталяваннем. Ніводнай адзінкі старой тэхнікі сюды не патрапіць. Пры гэтым колькасць койка-месцаў не зменшыцца, а вось умовы знаходжання зменяцца значна. Калі раней у палатах знаходзілася да пяці жанчын, то зараз будзе размяшчацца максімум дзве. Акрамя таго, тут даўно практыкуецца сумеснае знаходжанне маці і дзіцяці. 

Суботнік па азеляненні і навядзенні парадку на зямлі пройдзе сёння ў Магілёўскай вобласці. Асаблівая ўвага надаецца пасадцы новых дрэў і кустоў, уборцы і добраўпарадкаванню двароў, плошчаў, сквераў, вуліц, паркаў, зон адпачынку і іншых аб’ектаў сацыяльна-бытавога і культурнага прызначэння.