У Магілёве пры рамонце калектара знайшлі нешта падобнае на падземны ход

У Магілёве па вуліцы Сіманава падчас рамонтных работ па замене камунікацый рабочыя выявілі цагляны мур.

Рэстаўраваны ўчастак уваходзіць у былы комплекс ваеннай часткі. Недалёка знаходзіўся Лупалаўскі канцлагер. Гістарычных збудаванняў тут не было, тым не менш, убачыўшы цагляны мур, падобны на падземны ход, камунальнікі прыпынілі ўсе працы і адразу ж апавясцілі аб знаходцы ўсе адпаведныя службы. Гісторыкі падзякавалі работнікам за ўважлівасць і неабыякавасць. Але гэта не археалагічная знаходка, як сказаў дырэктар музея гісторыі Магілёва Аляксей Бацюкоў. Мур – адносна сучасны і з’явіўся ён, калі ўжо былі такія камунікацыі, як чыгунныя трубы. Ёсць меркаванне, што гэта дрэнаж. Раней падчас паводкі ў гэтым месцы было шмат вады, магчыма, канструкцыя адводзіла яе ў Днепр. Яшчэ ў яме знайшлі косткі буйных жывёл. Іх забралі на вывучэнне.

ТРК «Магілёў»