У Магілёве прыпынілі працу сеткі буйных гандлёвых аб’ектаў

У Магілёве з-за парушэнняў тэхнічных рэгламентаў Мытнага саюза прыпынена праца сеткі буйных гандлёвых аб’ектаў «Планета Адзенне Абутак». Пра гэта паведамілі ў Магілёўскай абласной інспекцыі Дзяржстандарту.

Як адзначылі ў інспекцыі, у гандлёвых аб’ектах ТАА «Мегапланета» прадукцыя лёгкай прамысловасці, прадукцыя для падлеткаў і дзяцей не адпавядала тэхнічным рэгламентам Мытнага саюза аб бяспецы ТР МС 007/2011 і ТР МС 017/2011. «Адсутнічалі дакументы, якія пацвярджаюць адпаведнасць прадукцыі патрабаванням названых рэгламентаў. Вырабы без такіх дакументаў не дапускаюцца да звароту на рынку. Акрамя таго, у маркіроўцы прадукцыі была няпоўная інфармацыя, якая не дазваляе ідэнтыфікаваць прадукцыю належным чынам», – адзначылі спецыялісты.

З сённяшняга дня праца названых гандлёвых аб’ектаў прыпынена. Рашэнне аб аднаўленні працы магазінаў можа быць прынята пасля ліквідацыі парушэнняў.

БЕЛТА