У пунктах правядзення рэпетыцыйнага тэставання Магілёўскай вобласці ўзмоцняць меры прафілактыкі ВРІ і каранавіруса

У пунктах правядзення рэпетыцыйнага тэставання Магілёўскай вобласці ўзмоцняць меры прафілактыкі ВРІ і каранавіруса. Пра гэта паведамілі ў абласным цэнтры гігіены, эпідэміялогіі і грамадскага здароўя.

15 сакавіка стартуе трэці – фінальны – этап рэпетыцыйнага тэставання, якое будзе праходзіць па нядзелях да 26 красавіка бягучага года. Гэта апошні шанец ацаніць сілы перад здачай цэнтралізаванага тэставання. Традыцыйна ён стане самым масавым, бо многія абітурыенты аддаюць перавагу правяраць веды ў канцы, калі пройдзены ўвесь навучальны матэрыял. Паводле папярэдніх звестак, РТ у Магілёўскай вобласці плануюць прайсці больш за 1 тыс. хлопцаў і дзяўчат.

У рэгіёне вызначана сем пунктаў для правядзення рэпетыцыйнага тэставання. Гэта Беларуска-Расійскі ўніверсітэт, Магілёўскі дзяржаўны ўніверсітэт імя А. А. Куляшова, Магілёўскі дзяржаўны ўніверсітэт харчавання, Клімавіцкі дзяржаўны аграрны каледж, Беларуская сельскагаспадарчая акадэмія ў Горках, Бабруйскі дзяржаўны аграрна-эканамічны каледж, Бабруйскі дзяржаўны аўтатранспартны каледж.

Суразмоўцы падкрэслілі, што органамі дзяржаўнага санітарнага нагляду вобласці ў мэтах забеспячэння санітарна-эпідэміялагічнага дабрабыту насельніцтва ў перыяд сезоннага ўздыму захворвання на ВРІ, папярэджання ўзнікнення і распаўсюджвання інфекцый, якія маюць міжнароднае значэнне і валодаюць высокім патэнцыялам эпідэмічнага распаўсюджвання, у тым ліку каранавіруснай інфекцыі, у рэгіёне сістэматычна праводзяцца санітарна-супрацьэпідэмічныя мерапрыемствы. Яны будуць арганізаваны і ў месцах здачы рэпетыцыйнага тэставання.

У прыватнасці, да пачатку РТ ва ўсіх установах адукацыі забяспечаць запас дэзсродкаў і вадкага мыла. Пры ўваходзе ў навучальныя карпусы, аўдыторыі, санвузлы і г. д. размесцяць антысептычныя сродкі для апрацоўкі рук навучэнцаў і персаналу. Гэтыя месцы пазначаць інфармацыйнымі таблічкамі. Акрамя таго, арганізуюць дадатковую апрацоўку антысептычнымі сродкамі дзвярных ручак, дзвярэй, поручняў, парэнчаў, кранаў і іншых месцаў, якія маюць вялікую колькасць тактыльных кантактаў.

Пры рассаджванні абітурыентаў будзе выкарыстоўвацца прынцып мінімізацыі рызык распаўсюджвання рэспіраторных інфекцый – не менш за адзін метр, рэжым праветрывання. Медыцынскія работнікі і педагогі будуць весці пастаянны кантроль за станам здароўя абітурыентаў.

Санітарна-эпідэміялагічнай службай распрацаваны і прадстаўлены ў навучальныя ўстановы інфармацыйна-адукацыйныя матэрыялы па пытаннях прафілактыкі ВРІ, каранавіруснай інфекцыі, якія размешчаны ў даступных месцах, як адзначылі суразмоўцы.

У дні рэпетыцыйнага тэставання спецыялісты органаў дзяржаўнага санітарнага нагляду будуць маніторыць правядзенне санітарна-супрацьэпідэмічных мерапрыемстваў на кожным аб’екце.