Урачы з Магілёўскай вобласці і Італіі дамовіліся абменьвацца вопытам

Урачы з Магілёўскай вобласці і Італіі змогуць абменьвацца вопытам і павышаць сваю кваліфікацыю. Дамоўленасці дасягнуты ў межах праекта доўгатэрміновай гуманітарнай дапамогі італьянскага дабрачыннага фонду ў Слаўгарадскім раёне.

Італьянскія валанцёры супрацоўнічаюць з нашым рэгіёнам не першы год. І гэта той выпадак, калі веды спецыялістаў дзвюх краін – на карысць і на здароўе людзей.

Сучаснае і яркае – такім павінна быць кансультацыйнае аддзяленне, дзе галоўныя наведвальнікі – дзеці. Нават калі гэта раённая паліклініка. Сцерці межы медыцынскай дапамогі паміж вялікім горадам і райцэнтрам пару гадоў таму стала магчыма дзякуючы італьянскаму дабрачыннаму фонду. Валанцёры за некалькі гадоў зрабілі рамонт у трох аддзяленнях Слаўгарадскай райбальніцы.

Не дзеля ўзнагароды, а па клічы сэрца які год гэтыя людзі бяруць адпачынак, каб правесці яго, па сутнасці, на будоўлі ў іншай краіне і падарыць праменьчык сонца кожнаму пацыенту. І вось яшчэ адно аддзяленне – прыёмнае – ужо прымае слаўгарадчан па-новаму. Тут аператыўна правядуць неабходныя абследаванні і вызначаць, якая дапамога патрэбна.

Гэта сумесны ўклад італьянскіх валанцёраў, улады і дэпутатаў у здаровую будучыню. Раённая бальніца абслугоўвае 12 тыс. жыхароў Слаўгарада і раёна. З іх амаль 3 тыс. – дзеці. І для кожнага дапамога павінна быць даступнай і якаснай.

Сёння ў рэгіёне рэалізуецца некалькі гуманітарных праектаў. Але самым паспяховым без перабольшання называюць менавіта гэты – з італьянскімі партнёрамі. Дзяцей са Слаўгарадскага раёна, які пацярпеў ад аварыі на Чарнобыльскай АЭС, прымаюць на аздараўленне італьянскія сем’і. Супрацоўніцтва працягнецца. І калі спецыялістам з розных краін атрымліваецца думаць у адным кірунку, гэта верная прыкмета таго, што ідэя вартая рэалізацыі.

ТРК «Могилев»