Урачыстае адкрыццё трэцяга працоўнага семестра 2019 года адбудзецца ў Магілёве 14 чэрвеня

Урачыстае адкрыццё трэцяга працоўнага семестра 2019 года, прысвечанага 75-годдзю вызвалення Беларусі ад нямецка-фашысцкіх захопнікаў, адбудзецца ў Магілёве 14 чэрвеня. Пра гэта паведамілі ў абласным камітэце ГА «БРСМ».

Мерапрыемства з удзелам прадстаўнікоў гарадскіх і раённых штабоў студэнцкіх атрадаў, працоўных спраў устаноў адукацыі, камандзіраў і камісараў, першых сакратароў тэрытарыяльных камітэтаў ГА «Беларускі рэспубліканскі саюз моладзі» пачнецца ў 11.30 на пляцоўцы каля корпуса №7 Беларуска-Расійскага ўніверсітэта.

Кожнаму штабу будуць уручаны працоўныя пуцёўкі для працы на сацыяльна значных аб’ектах Магілёўскай вобласці.

Пасля адкрыцця ў 12.15 удзельнікі мерапрыемства пройдуць на семінар-вучобу па арганізацыі дзейнасці студэнцкіх атрадаў. Мерапрыемства пройдзе па групах.

«Першыя сакратары тэрытарыяльных камітэтаў БРСМ даведаюцца асаблівасці арганізацыі дзейнасці студатрадаў у працоўным семестры 2019 года, вядзення дакументацыі, патрабаванні аховы працы і заканадаўства аб працы, інфармацыю па арганізацыі ўнутрыатраднай дзейнасці, – удакладнілі суразмоўцы. – Камандзіры і камісары студэнцкіх атрадаў возьмуць удзел у трэнінгах на камандаўтварэнне, а таксама пазнаёмяцца з асаблівасцямі арганізацыі ўнутрыатраднай дзейнасці, сістэмай працы камісара, культурай студатрадаўскага руху, сімволікай, яго традыцыямі. Па выніках семінара-вучобы ўсе пройдуць тэставанне па пытаннях арганізацыі дзейнасці студэнцкіх атрадаў».

Нагадаем: 2019-ы год Беларускі рэспубліканскі саюз моладзі аб’явіў годам студэнцкіх атрадаў. Такое рашэнне было прынята на III Пленуме Цэнтральнага Камітэта саюза моладзі.