Выстава фотаздымкаў Мікалая Хацяінцава адкрыецца ў Магілёўскім мастацкім музеі імя П. В. Масленікава 22 студзеня

Выстава фотаздымкаў Мікалая Хацяінцава «Дыханне зімы» адкрыецца ў Магілёўскім абласным мастацкім музеі імя П. В. Масленікава 22 студзеня. Пра гэта паведамілі ва ўстанове культуры.

У экспазіцыі будуць прадстаўлены работы майстра пяці апошніх гадоў яго творчай дзейнасці: гарадскія і сельскія зімовыя пейзажы, макраздымкі фактур снегу і лёду, жанравыя сцэны. «Заснежаныя прасторы, свежасць марозных дзён на фота пацешаць гледача, які стаміўся ад няпэўнасці анамальнай зімы», – падкрэслілі суразмоўцы. 

Мікалай Хацяінцаў–магілёўскі фатограф, пастаянны ўдзельнік міжклубных выстаў і конкурсаў, лаўрэат другога Усесаюзнага фестывалю народнай творчасці, прызёр гарадскога конкурсу на самую лепшую фотасерыю аб Магілёве. Ён адзін з пераможцаў фотаконкурсу на самую лепшую навагоднюю паштоўку «PF-2020», якая таксама будзе прадстаўлена на выставе. Работы майстра экспануюцца ў фотасалонах Польшчы, Іспаніі, Ганконга і Бельгіі.

Урачыстае адкрыццё выставы, якая працягнецца да 16 лютага, адбудзецца 22 студзеня ў 16.00.