Юныя журналісты з гімназіі Мсціслава сталі пераможцамі рэспубліканскага конкурсу «Ты ў эфіры» ў намінацыі «Сацыяльная сетка»

У Мінску адбылася цырымонія ўзнагароджання пераможцаў і прызёраў рэспубліканскага конкурсу «Ты ў эфіры». Сярод самых лепшых і таленавітых юных журналістаў аказалася каманда «MTVM» гімназіі г. Мсціслава.

Праект «Міжшкольнае тэлебачанне», створаны ў пачатку 2019 года настаўнікамі і навучэнцамі гімназіі стаў інфармацыйнай падставай для многіх сродкаў масавай інфармацыі краіны. Не застаюцца без увагі школьныя навіны і сёння. За год працы над праектам хлопцы і дзяўчаты пад кіраўніцтвам настаўніка гісторыі Уладзіміра Страхі і настаўніка замежнай мовы Наталлі Пратасевіч прынялі ўдзел у розных конкурсах юных журналістаў. У маі каманда стала лаўрэатам моладзевага медыяфестывалю «Галасы маладых за ўстойлівае развіццё – 2019», месяц таму актыўнасць хлопцаў была адзначана дыпломам 2 ступені ў абласным этапе конкурсу «Ты ў эфіры». А 3 снежня навучэнцаў установы адукацыі чакаў сюрпрыз. Юныя журналісты сталі пераможцамі ў намінацыі «Сацыяльная сетка». Спецыяльны прыз юнага журналіста атрымаў самы малодшы ўдзельнік каманды Мікіта Пратасевіч.

За адзінаццаць месяцаў творчы калектыў зняў і зманціраваў некалькі дзясяткаў ролікаў, якія размяшчалі ў сацыяльных сетках «УКантакце» і «Аднакласнікі». Відэасюжэты з раённых мерапрыемстваў, рэпартажы пра школьнае жыццё можна было ўбачыць і на відэахостынгу «Ютуб». Некалькі сотняў падпісчыкаў у сацыяльных сетках і відэаканале сталі пастаяннымі гледачамі школьных навін, а некаторыя сюжэты набіралі больш за 10 тысяч праглядаў.

У камандзе юных журналістаў з гімназіі 10 ініцыятыўных, творчых хлапчукоў і дзяўчынак розных узростаў. Яны штодня адкрываюць у сабе новыя таленты і здольнасці, спрабуюць сябе ў ролі сцэнарыстаў, рэпарцёраў, відэааператараў і відэарэдактараў.

– Міжшкольнае тэлебачанне – гэта праект, які дазволіў мне адкрыць перад сабой новыя магчымасці, знаёмствы, – гаворыць навучэнец 6 класа Андрэй Цывіс. – Ён для мяне стаў хобі. Мне падабаецца здымаць відэаролікі і мець зносіны з новымі цікавымі людзьмі. Часам я задумваюся аб тым, што гэта захапленне можа перарасці ў прафесійную дзейнасць.

Акрамя прызавога дыплома і памятнай статуэткі за перамогу ў рэспубліканскім конкурсе сапраўдным падарункам для Валерыі Івановай, Мікіты Пратасевіча, Андрэя Цывіса, Рамана Кемцава, Кацярыны Тарачанка, Дар’і Макаравай стала экскурсія на тэлепляцоўку канала АНТ. Вучні змаглі не толькі ўбачыць закуліссе здымачнай пляцоўкі, але і пагутарыць з вядучымі тэлеканала і задаць пытанні, якія іх цікавілі.

Наталля Ціханоўская, mstlife.by