Лёгкаатлетычны забег «Дарога да шчасця» пройдзе 29 чэрвеня ў Магілёве. Мерапрыемства арганізавана ў межах святкавання Дня горада, паведамілі ў аддзеле спорту і турызму гарвыканкама.

Пазмагацца за лідарства могуць усе жадаючыя ад 16 гадоў. Пры гэтым абавязковай атрыбутыкай для мужчын стануць кашуля (тэніска), гальштук або бабачка, а для жанчын – фата (галаўны ўбор) і букет кветак. Акрамя таго, удзельнікі павінны будуць стартаваць і фінішаваць парамі.

Пачнецца забег у 12.00 ад гандлёвага цэнтра «Магніт». Спартыўны дух і добры настрой на час зоймуць вуліцу Першамайскую. Завершыцца спаборніцтва каля Магілёўскай абласной філармоніі.

Сертыфікаты ўдзельніка атрымае 300 першых фінішораў, якія пераадолелі дыстанцыю.  Першым тром парам уручаць каштоўныя прызы.

Збор і рэгістрацыя ўдзельнікаў – 29 чэрвеня з 11.00 да 11.50 на аўтамабільнай стаянцы ГЦ «Магніт».