Горацкі раён далучыўся да рэспубліканскай патрыятычнай акцыі «У славу агульнай перамогі», прымеркаванай да святкавання 75-годдзя Перамогі савецкага народа ў Вялікай Айчыннай вайне. У межах праекта ў кожным сельсавеце прайшлі мітынгі ля помнікаў, устаноўленых у памяць пра тых, хто абараняў родную зямлю ад фашысцкай чумы. З месцаў пахавання мірных жыхароў, якія загінулі ў гады вайны, брацкіх магіл савецкіх салдат, якія змагаліся за мір і свабоду, былі зроблены заборы зямлі. Кульмінацыйным момантам першага этапу акцыі «У славу агульнай перамогі» стаў мітынг, які адбыўся 10 кастрычніка ля мемарыяла «Журботная маці». У Горкі даставілі зямлю з 44 воінскіх пахаванняў. Падчас вайны на тэрыторыі раёна загінула звыш 4 тыс. савецкіх салдат і афіцэраў, больш за 8 тыс. мірных жыхароў. Зямлю з месцаў пахаванняў сабралі ў адзіную капсулу. Фіналам праекта стане закладка свяшчэннай зямлі, узятай з усіх памятных месцаў рэспублікі, у нішы храма-помніка ў гонар Усіх Святых у Мінску. Цырымонія пройдзе 9 мая 2020 года – у дзень 75-годдзя Вялікай Перамогі.
Фота Михаіла Ляўцова, gorkiv.by
Пры выкарыстанні матэрыялаў актыўная гіперспасылка на mogilev-region.gov.by абавязковая