Альманах «Лица Победы» выдадзены Магілёўскім літаратурным аб’яднаннем «Ветэран»

Альманах «Лица Победы» выдадзены літаратурным аб’яднаннем «Ветэран» пры Магілёўскім гарадскім Савеце ветэранаў. Пра гэта паведамілі ў арганізацыі.

Зборнік прымеркаваны да 75-годдзя вызвалення Беларусі ад нямецка-фашысцкіх захопнікаў. Ён уключае нарысы аб дваццаці васьмі ветэранах Вялікай Айчыннай вайны, іх успаміны пра перажытае ў 1941-1945 гадах, а таксама найлепшыя работы абласнога конкурсу сачыненняў школьнікаў «75 мірных гадоў у гісторыі маёй сям’і».

Героі эсэ – звычайныя магілёўцы, якія жывуць побач, суседзі і знаёмыя, на чыю долю выпалі страшныя выпрабаванні вайной. Свае ўспаміны яны адрасуюць маладому пакаленню – школьнікам і студэнтам, журналістам і гісторыкам. З іх удзелам спадзяюцца захаваць памяць аб ратным подзвігу салдат Айчыны, якія на сваіх плячах вынеслі ўсе нягоды ваеннага ліхалецця, бачылі ў твар смерць і заваявалі перамогу.

Альманах таксама прысвечаны дзесяцігоддзю літаратурнага аб’яднання «Ветэран». Адсвяткуюць юбілей у снежні бягучага года. Зараз у складзе арганізацыі прафесійныя пісьменнікі, паэты-аматары і журналісты горада, у тым ліку па тры члены Саюза пісьменнікаў Беларусі і Расійскага саюза пісьменнікаў.

mogilevnews.by