Аляксандр Лукашэнка: Магілёўская вобласць гатова паспяхова вырашыць усе задачы аграпрамысловай галіны

Прэзідэнт Беларусі Аляксандр Лукашэнка накіраваў прывітанне ўдзельнікам і гасцям абласнога фестывалю-кірмашу «Дажынкі-2019» у Магілёве.Пра гэта паведамілі ў прэс-службе беларускага лідара.

«Спакон веку на зямлі працавалі і перадавалі свае традыцыі нашчадкам самыя адказныя, добрасумленныя, мудрыя людзі. Дзякую ўсім, хто выгадаваў і сабраў да апошняга зярнятка наш хлеб – самае каштоўнае «беларускае золата», хто забяспечвае рэспубліку гароднінай, мясам і малаком», – гаворыцца ў прывітанні.

Кіраўнік дзяржавы падкрэсліў, што сельскагаспадарчая прадукцыя ўсходняга рэгіёна краіны пастаўляецца ў дзясяткі краін свету і патэнцыял гэтай зямлі ацанілі буйныя айчынныя і міжнародныя вытворцы.

«Перакананы: Магілёўшчына гатова паспяхова вырашыць усе пастаўленыя перад ёй задачы аграпрамысловай галіны. Бо галоўным рэсурсам рэгіёна з’яўляюцца яго жыхары, чые працавітасць і сіла духу заўсёды накіраваны на карысць роднай Беларусі», – адзначыў Прэзідэнт.

Аляксандр Лукашэнка пажадаў працаўнікам сяла і іх сем’ям моцнага здароўя, міру, дабра, дабрабыту і нязменнай удачы ва ўсіх пачынаннях.

БЕЛТА