Цягнік Гомель – Магілёў – Віцебск будзе хадзіць на рэгулярнай аснове

Беларуская чыгунка працягвае курсіраванне новага цягніка ў зносінах Гомель – Магілёў – Віцебск. Пра гэта паведамляецца на сайце БЧ.

Цягнік № 697/698 адпраўляецца з Гомеля па нядзелях у 17.16 і прыбывае ў Віцебск у 23.26. У зваротным кірунку з Віцебска цягнік адпраўляецца ўжо пасля паўночы – а 1.00 панядзелка і а 7.36 прыбывае на станцыю Гомель. У дарозе цягнік робіць прыпынкі на станцыях Буда-Кашалёўская, Жлобін, Рагачоў, Быхаў, Магілёў, Шклоў і Орша.

Кошт праезду ў плацкартным вагоне ад Гомеля да Віцебска складае Br10,96, а ў купэйным – Br15, 20.

Падрабязнасці аб раскладзе і кошце праезду можна даведацца праз мабільны дадатак «БЧ.Мой поезд», на афіцыйным сайце www.rw.by, а таксама па нумары 105 кантакт-цэнтра Беларускай чыгункі.

Нагадаем: у мэтах павышэння ўзроўню транспартнага абслугоўвання насельніцтва з 27 верасня 2020 года Беларуская чыгунка прызначыла цягнік міжрэгіянальных ліній, які па нядзелях і панядзелках звязаў тры абласныя цэнтры. З пачатку курсіравання ім скарысталася каля 1,8 тыс. пасажыраў. З улікам запатрабаванасці маршруту цягнік і быў прызначаны на рэгулярнай аснове.