ДАІ Магілёўшчыны просіць аўтааматараў праяўляць павышаную ўвагу і асцярожнасць падчас моцных маразоў

У сувязі са значным паніжэннем тэмпературы Дзяржаўтаінспекцыя рэгіёна звяртаецца да ўсіх удзельнікаў дарожнага руху і заклікае праяўляць павышаную ўвагу і асцярожнасць. Пра гэта паведамілі ў аддзяленні па агітацыі і прапагандзе ДАІ УУС Магілёўскага аблвыканкама.

«У марозныя дні лепш за ўсё скарыстацца паслугамі грамадскага транспарту, але, калі без асабістага аўтамабіля не абысціся, кіроўцам варта падрыхтавацца да паездкі належным чынам», – адзначылі суразмоўцы. – Калі вы адпраўляецеся ў дарогу на значную адлегласць, то вазьміце з сабой цёплыя рэчы, гарачае пітво, ежу, а таксама зарадную прыладу для свайго тэлефона».

Неабходна праверыць стан аўтамабіля, узроўні ўсіх тэхнічных вадкасцяў, у тым ліку запоўніць бачок абмывацеля незамярзальнай вадкасцю, таксама не забудзьцеся праверыць наяўнасць буксіровачнага троса, рыдлёўкі, запаснога кола, дамкрата, знака аварыйнага прыпынку.

Пры планаванні паездак вадзіцелі павінны ўлічваць не толькі ўмовы надвор’я, стан свайго транспартнага сродку, але і ўласныя навыкі ваджэння ў зімовых умовах.

Акрамя таго, не варта забываць аб безумоўным выкананні правілаў дарожнага руху. Варта адмовіцца ад здзяйснення рызыкоўных манеўраў і рэзкіх тармажэнняў, выбіраць бяспечны хуткасны рэжым, трымаць дыстанцыю і выконваць бакавы інтэрвал.

«Калі ў дарозе вам спатрэбілася дапамога, паведаміце пра гэта па тэлефоне 102. Экіпажы ДАІ арыентаваныя не толькі на гарантаванне бяспекі дарожнага руху, але і на аказанне дапамогі ўсім, хто трапіў у складаную сітуацыю на дарозе», – падсумавалі ў ДАІ.

Рэд.