Грант Прэзідэнта Рэспублікі Беларусь у галіне аховы здароўя на 2019 год выдзелены загадчыку аддзялення анестэзіялогіі і рэанімацыі Магілёўскай гарадской бальніцы хуткай медыцынскай дапамогі Дзянісу Маркевічу.

З 2016 года ён і ўрачы аддзялення займаюцца распрацоўкай і ўкараненнем у практыку камбінаванага абязбольвання пры цяжкіх чэрапна-мазгавых траўмах, ужываючы не толькі агульную анестэзію, але і блакуючы перыферычныя нервы валасістай часткі галавы.

«Гэта вельмі значна, бо пры традыцыйнай анестэзіі не менш за 70% пацыентаў пасля аператыўных умяшальніцтваў на галаве і галаўным мозгу перажываюць пакутлівыя болі, – растлумачыў загадчык нейрахірургічнага аддзялення бальніцы Яўгеній Ананчанка. – Камбінаваная жа методыка абязбольвання дазваляе ўздзейнічаць на ўсе звенні развіцця болевага сіндрому, купіруючы або значна памяншаючы боль як падчас аперацыі, так і ў пасляаперацыйным перыядзе».

Распрацоўкі Дзяніса Маркевіча і яго калег спрыяюць павышэнню якасці аказання медыцынскай дапамогі цяжкім пацыентам. А сродкі гранта дазволяць і ў далейшым удасканальваць методыкі і схемы камбінаванага абязбольвання ў нейрахірургіі.

Гранты Прэзідэнта заснаваны ў мэтах фінансавай падтрымкі дзейнасці, якая мае прыярытэтнае значэнне для развіцця Рэспублікі Беларусь, у навуцы, адукацыі, ахове здароўя, культуры. Гранты з’яўляюцца стымулявальнай выплатай і прадастаўляюцца кіраўнікам і спецыялістам арганізацый, якія ажыццяўляюць дзейнасць у навуцы, адукацыі, ахове здароўя, культуры і ўнеслі значны ўклад у развіццё адпаведнай галіны, пры гэтым удзельнічаюць у навуковых даследаваннях, інавацыйных праектах, якія маюць прыярытэтнае значэнне для рэалізацыі дзяржаўных праграм і найважнейшых напрамкаў сацыяльна-эканамічнага развіцця Рэспублікі Беларусь, тэрмінам на адзін год.

mogilevnews.by