Касцюковічы прымуць спартакіяду кіруючага складу органаў унутраных спраў Магілёўскай вобласці

XII спартакіяда кіруючага складу органаў унутраных спраў Магілёўскай вобласці, прысвечаная 75-й гадавіне вызвалення Рэспублікі Беларусь ад нямецка-фашысцкіх захопнікаў, пройдзе 18 мая ў Касцюковічах. Пра гэта паведамілі ў групе інфармацыі і грамадскіх сувязяў УУС Магілёўскага аблвыканкама.

У спаборніцтвах прыме ўдзел 16 каманд, якія складаюцца з прадстаўнікоў кіруючага складу УУС і нададзеных падраздзяленняў, а таксама абласнога ўпраўлення Дэпартамента аховы МУС і тэрытарыяльных АУС вобласці.

Насычаная праграма ўключае спаборніцтвы ў камандным заліку (міні-футбол, пляжны валейбол, перацягванне канату, плаванне) і асабістым першынстве (рывок гіры 24 кг, армрэстлінг, афіцэрскае трохбор’е, настольны тэніс, спартыўная рыбалка). Асобны комплекс спаборніцтваў запланаваны сярод начальнікаў АУС.

Таксама прадугледжаны конкурсы, у якіх змогуць прыняць удзел усе, хто жадае: стральба з пнеўматычнай зброі і лука, сілавы экстрым, дартс, футбольны снайпер, штурханне бервяна, хуткаснае забіванне цвікоў. Паколькі на спартакіяду запрашаюцца сем’і супрацоўнікаў, арганізатары прадугледзелі конкурсы і для дзяцей.

Адкрыццё спартакіяды адбудзецца на базе фізкультурна-аздараўленчага цэнтра. Пасля ўрачыстай цырымоніі прадстаўнікі кіраўніцтва ўпраўлення ўнутраных спраў і начальнікі АУС на чале з начальнікам УУС палкоўнікам міліцыі Ігарам Шчарбачэнем ускладуць кветкі да мемарыяльнага комплексу «Воінам, якія загінулі ў гады Вялікай Айчыннай вайны» і наведаюць з экскурсіяй славутасці раёна. У гэты ж дзень адбудзецца адкрыццё спартыўнай залы Касцюковіцкага РАУС.

Арганізатары абласнога міліцэйскага спартыўнага форума запрашаюць усіх у Касцюковічы. «Удзельнікам і гасцям гарантаваны добры настрой і незабыўныя эмоцыі. Пераможцаў і прызёраў чакаюць кубкі, медалі, дыпломы, – адзначылі суразмоўцы. – Жадаем камандам лёгкіх стартаў і пераможных фінішаў».