Рус Бел Eng 中文

Мемарыяльны комплекс «Буйніцкае поле» рыхтуюць да святкавання 75-годдзя вызвалення Беларусі ад нямецка-фашысцкіх захопнікаў

Мемарыяльны комплекс «Буйніцкае поле» рыхтуюць да святкавання 75-годдзя вызвалення Беларусі ад нямецка-фашысцкіх захопнікаў. Напярэдадні Дня Незалежнасці тут завяршаюцца мерапрыемствы па добраўпарадкаванні.

«На працягу месяца на тэрыторыі комплексу на чатырох участках замянілі больш за 2,3 тыс. кв. м тратуарнай пліткі, у асноўным, дзе была вострая неабходнасць. Напрыклад, дарожка «Алеі памяці і славы» абноўлена цалкам. Там жа зроблены пандус, заменена плітка на пляцоўцы каля «Возера слёз», – распавяла начальнік вытворча-тэхнічнага аддзела «Магілёўзеленбуда» Святлана Банкузава.

У межах абнаўлення на пад'ездах да мемарыяла з боку горада ўстаноўлена 47 кветкавых ваз па раздзяляльнай паласе аўтатрасы. Усяго на тэрыторыі комплексу высаджана больш за 9,5 тыс. штук расады кветак і 55 туй. Праект па абнаўленні рэалізаваны за кошт гарадскога бюджэту.

Па словах Святланы Банкузавай, зялёная тэрыторыя комплексу складае 17 га, працягласць дарожак – больш за 10 тыс. кв. м. Догляд за імі ў кругласутачным рэжыме ажыццяўляюць 8 работнікаў «Магілёўзеленбуда». Пры неабходнасці адбываецца дадатковы сезонны набор людзей.

«Мемарыяльны комплекс «Буйніцкае поле» – святое для ўсіх нас месца, таму стараемся утрымліваць яго ў ідэальнай чысціні, падтрымліваць стан яго экспанатаў. У святочныя дні чакаем вялікую колькасць наведвальнікаў, што таксама прадугледжвае комплекс падрыхтоўчых мер», – адзначыў навуковы супрацоўнік Музея гісторыі Магілёва, які працуе непасрэдна на пляцоўцы комплексу, Пётр Хаванскі.

З моманту адкрыцця, а гэта 9 мая 1995 года, комплекс «Буйніцкае поле» карыстаецца павышанай цікавасцю ў жыхароў горада і турыстаў. У святы наведваюць яго тысячы людзей. Кожныя выхадныя – па пяць і больш экскурсійных груп прыязджаюць у Буйнічы, каб пакланіцца абаронцам горада.

Па матэрыяле mogilevnews.by

Пры выкарыстанні матэрыялаў актыўная гіперспасылка на mogilev-region.gov.by абавязковая