RU BY EN 中文
Twitter Instagram

Місія назіральнікаў ШАС наведвае выбарчыя ўчасткі Магілёўскай вобласці

Кароткатэрміновая місія міжнародных назіральнікаў ад Шанхайскай арганізацыі супрацоўніцтва наведвае выбарчыя ўчасткі Магілёўшчыны.

У аблвыканкаме з назіральнікамі сустрэўся старшыня Магілёўскай абласной выбарчай камісіі па выбарах дэпутатаў Палаты прадстаўнікоў Нацыянальнага сходу сёмага склікання Валерый Берастаў. Падчас дыялогу ён праінфармаваў гасцей аб тым, як праходзіць кампанія ў рэгіёне. У прыватнасці, у вобласці створана 13 выбарчых акругаў, балатуюцца 62 кандыдаты. За пяць дзён у датэрміновым галасаванні прыняло ўдзел больш за 39% выбаршчыкаў.

Місія назіральнікаў ШАС ажыццяўляе сваю дзейнасць на тэрыторыі Беларусі ў перыяд з 13 па 18 лістапада 2019 года ў адпаведнасці з Палажэннем аб місіі назіральнікаў ад Шанхайскай арганізацыі супрацоўніцтва на прэзідэнцкіх або парламенцкіх выбарах, а таксама рэферэндумах ад 15 мая 2006 года і працуе па запрашэнні Міністэрства замежных спраў нашай краіны. У яе складзе 17 назіральнікаў, у ліку якіх прадстаўнікі заканадаўчых, выканаўчых і выбарчых органаў дзяржаў-членаў ШАС, а таксама службовыя асобы Сакратарыята і РАТС ШАС.

Члены місіі разгарнулі назіранне ў трох гарадах краіны: Мінску, Магілёве і Брэсце, а таксама ў населеных пунктах гэтых рэгіёнаў. У Магілёў прыехалі чатыры назіральнікі, якія прадстаўляюць рэгіянальную антытэрарыстычную структуру і Сакратарыят ШАС, Таджыкістан і Узбекістан.

Як расказаў прадстаўнік сакратарыята ШАС Самадзі Шохін, назіраць за выбарамі ў парламент – высокі гонар і адказнасць, паколькі Беларусь з’яўляецца важным партнёрам арганізацыі. «Мы падыходзім да гэтага пытання з вялікай адказнасцю, – падкрэсліў суразмоўца. – На сённяшні дзень, па нашаму думку, выбары арганізаваны вельмі добра».

 

Назіральнікі, наведваючы выбарчыя ўчасткі Магілёўскай вобласці, будуць звяртаць увагу на тое, як яны абсталяваны для людзей з абмежаванымі магчымасцямі: падыход, даступнасць, спецыяльныя кабінкі. Яшчэ адзін момант – выкарыстанне сучасных тэхналогій у межах выбарчага заканадаўства.

Усімі выбарчымі камісіямі Магілёўскай вобласці (абласной, 13 акруговымі і 739 участковымі) акрэдытавана каля 4,5 тыс. назіральнікаў. У рэгіёне працуюць 33 назіральнікі ад місіі СНД, 30 – ад Бюро па дэмакратычных інстытутах і правах чалавека (БДІПЧ) АБСЕ.

Пры выкарыстанні матэрыялаў актыўная гіперспасылка на mogilev-region.gov.by абавязковая