Рус Бел Eng 中文

Памятныя знакі «У гонар 75-годдзя поўнага вызвалення Ленінграда ад фашысцкай блакады» ўручылі жыхарам Магілёва

Памятныя знакі «У гонар 75-годдзя поўнага вызвалення Ленінграда ад фашысцкай блакады» ўручылі сёння адзінаццаці жыхарам Магілёва. Урачыстая цырымонія адбылася ў Гарадской выставачнай зале.

Адкрываючы мерапрыемства, першы сакратар пасольства Расійскай Федэрацыі ў Рэспубліцы Беларусь Сяргей Сядых адзначыў, што больш за 75 гадоў таму, 27 студзеня 1944 года, была знята блакада Ленінграда. Напярэдадні гэтага слаўнага юбілею гарадскі ўрад цяперашняга Санкт-Пецярбурга заснаваў памятны знак «У гонар 75-годдзя поўнага вызвалення Ленінграда ад фашысцкай блакады». Улады нязломленага горада вырашылі ўручыць яго як грамадзянам Расійскай Федэрацыі, так і замежным грамадзянам, якія пражываюць у далёкім і блізкім замежжы і ўзнагароджаным медалём «За абарону Ленінграда», знакам «Жыхару блакаднага Ленінграда». Дапамогу з уручэннем памятнай узнагароды за межамі Расіі закліканы аказаць дыпламаты.

«Лічу, гэта правільна – не дзяліць блакаднікаў на тых, хто жыве ў горадзе, і тых, хто жыве за яго межамі. Нельга дапусціць, каб хтосьці быў забыты», – падкрэсліў Сяргей Сядых. Ён выканаў ганаровую місію і ўручыў памятныя знакі блакаднікам, якія пражываюць у Магілёве: Рыме Авяр’янавай, Людміле Гейчанка, Жанне Ерашэнка, Нэлі Рыбаковай, Яўгеніі Чэхаўскай, Надзеі Краўчанка, Уладзіміру Лебедзеву, Лідзіі Палячонак, Алегу Палячонку, Лізавеце Хомчанка, Лідзіі Чмырыкавай.

Падзякаваць блакаднікам за стойкасць і мужнасць таксама прыйшлі намеснік старшыні гарвыканкама Ала Галушка, начальнік упраўлення па працы, занятасці і сацыяльнай абароне гарвыканкама Марына Снытко, старшыня гарадской арганізацыі ветэранаў Зінаіда Пянькова.

У Магілёве сёння пражывае 21 жыхар блакаднага Ленінграда. Кожны, будучы дзіцём або падлеткам, перанёс нечалавечыя пакуты ў абложаным горадзе. Таму некаторыя па стане здароўя не змаглі прысутнічаць на сустрэчы. Аднак усе яны без выключэння атрымаюць памятныя знакі ва ўрачыстай абстаноўцы дома.

Пры выкарыстанні матэрыялаў актыўная гіперспасылка на mogilev-region.gov.by абавязковая