Расійскі фестываль анімацыйнага кіно: акцыя «Адкрытая прэм’ера» пройдзе 11–14 сакавіка ў Магілёве

У Суздалі 11–16 сакавіка пройдзе ХХV адкрыты расійскі фестываль анімацыйнага кіно. Яго арганізатары сёмым разам праводзяць шырокамаштабную акцыю «Адкрытая прэм’ера», сутнасць якой – паказ найноўшых мультфільмаў конкурснай праграмы і галасаванне гледачоў за ўпадабаную карціну. Сёлета яны стартуюць 11 сакавіка.

Як і ўсе папярэднія гады, у кожным горадзе-ўдзельніку акцыі паводле вынікаў галасавання вызначыцца найлепшы, на думку гледачоў, фільм. Карціна, якая набярэ самую вялікую колькасць галасоў, атрымае спецыяльны прыз фестывалю на ўрачыстай цырымоніі яго закрыцця.

У ліку новых пляцовак «Адкрытай прэм’еры»– Магілёўскае дзяржаўнае прадпрыемства «Кінавідэапракат». Паказы праграм анімацыйных фільмаў (з глядацкім галасаваннем) пройдуць у малой зале кінатэатра «Радзіма» з 11 па 14 сакавіка.

Даведачна

Акцыя «Адкрытая прэм’ера», пачаўшыся з 7 гарадоў, значна «падрасла» і ў 2019 годзе была праведзена ў больш чым 300 гарадах і населеных пунктах Расіі. Колькасць пляцовак перавысіла 400, а сумарная колькасць гледачоў, якія паглядзелі фільмы «Адкрытай прэм’еры», дасягнула 125 тыс. І кожную вясну да акцыі далучаюцца новыя гарады і пасёлкі.