Рус Бел Eng 中文

Рэспубліканская акцыя «Бяспека – у кожны дом!» пройдзе ў Магілёўскай вобласці з 20 студзеня па 20 лютага

Рэспубліканская акцыя «Бяспека – у кожны дом!» пройдзе ў рэгіёне з 20 студзеня па 20 лютага. Пра гэта паведаміла старшы інспектар абласнога ўпраўлення МНС Вольга Нядобрых.

«У 2019 годзе ў рэгіёне зарэгістравана 778 пажараў, якія забралі жыцці 76 чалавек, у тым ліку 2 дзяцей, – адзначыла суразмоўца. – Прычыны надзвычайных сітуацый банальныя: неасцярожнае абыходжанне з агнём, парушэнне правілаў эксплуатацыі пячнога ацяплення і электраабсталявання, дзіцячае свавольства.

З мэтай папярэджання пажараў і гібелі людзей у рэспубліцы аб’яўлена спецыяльная акцыя, якая ў Магілёўскай вобласці будзе складацца з пяці этапаў.

20–26 студзеня праект ахопіць цэнтры бяспекі, наркадыспансеры, а таксама апорныя пункты грамадскага правапарадку. Мэтавая аўдыторыя – асобы, якія злоўжываюць алкаголем і вядуць асацыяльны лад жыцця. Тут сумесна з прадстаўнікамі УУС, БРСМ, БДПА, БГА «Выратавальнік», «Чырвоны Крыж» ратавальнікі правядуць мерапрыемства «Цвярозы погляд на бяспеку».

З 27 студзеня па 2 лютага прафілактычныя гутаркі, дэманстрацыя відэафільмаў, віктарыны па АБЖ, канцэртныя праграмы з абавязковым уручэннем навучальнай наглядна-выяўленчай прадукцыі пройдуць на адкрытых пляцоўках сельскіх саветаў, у аддзяленнях дзённага знаходжання на базе тэрытарыяльных цэнтраў сацыяльнага абслугоўвання насельніцтва. Прыярытэт будзе аддадзены навучанню пажылых людзей, адзінокіх грамадзян правільным дзеянням у выпадку ўзнікнення надзвычайнай сітуацыі.

3–7 лютага пад прафілактычны ўдар патрапяць працоўныя калектывы. Акцыя пройдзе ў санаторыях, на прадпрыемствах, у арганізацыях. Прадстаўнікі МНС, а таксама актывісты БМГАВП, работнікі ўстаноў культуры правядуць лекцыі, тэматычныя конкурсы і віктарыны, прадэманструюць фільмы і ролікі па тэматыцы АБЖ, прапануюць канцэртныя праграмы.

10–14 лютага эстафету бяспекі падхопяць ВНУ, ССНУ, ліцэі, каледжы. Праграма, як і прадугледжвае мэтавая аўдыторыя, дынамічная: тэматычныя гульнявыя праграмы і дыскатэкі, ток-шоу, прафілактычныя гутаркі і адпрацоўка планаў эвакуацыі ў выпадку пажараў і НС. Мерапрыемствы адбудуцца як на базе навучальных устаноў, так і ў інтэрнатах.

Фінальны 5-ы этап пройдзе 17–20 лютага. Жыхароў вобласці чакаюць на адкрытых пляцоўках, у буйных гандлёвых цэнтрах, рынках і г.д. Ратавальнікі правядуць тут конкурсы і віктарыны на веданне асноў бяспечных паводзін, навучаць правільным паводзінам у НС.

Пры выкарыстанні матэрыялаў актыўная гіперспасылка на mogilev-region.gov.by абавязковая