RU BY EN 中文
Twitter Instagram

У гаспадарцы «Максімавічы-Агра» Клічаўскага раёна імкнуцца працаваць стабільна і прыбыткова

Харчовая бяспека абавязкова стане ключавым словам у найбліжэйшай будучыні. «Максімавічы-Агра»– гаспадарка ў Клічаўскім раёне. Тут імкнуцца працаваць стабільна і прыбыткова.

Мясцовай ферме–4 гады. Тут каля 3-х соцень кароў, і па выніках мінулага года надаілі 7 тысяч 700 кілаграм на ўмоўную галаву. У цэлым па гаспадарцы за мінулы год павысіліся надоі амаль на 10%. Як гэта атрымалася? У першую чаргу, з дапамогай тэхналагічнай дысцыпліны і неабыякавага стаўлення да працы.

Даяркі, якія працуюць на гэтым комплексе – а іх усяго 4, –атрымліваюць па тысячы рублёў на месяц. Іх заробак не проста цалкам заслужаны, але і залежыць ад вынікаў. На гэтым комплексе толькі малако гатунку «Экстра».

Больш за 20 гадоў гаспадаркай кіруе Васіль Белы. А працуе ў ім удвая даўжэй – ён вярнуўся ў родныя мясціны пасля вучобы і стаў інжынерам. Калісьці гэта быў калгас «Радзіма», цяпер–адкрытае акцыянернае таварыства «Максімавічы-Агра». Вытворчасць тут– малочна-мяснога напрамку, раслінаводства заклікана забяспечыць жывёл якаснымі кармамі. Цэнтр гаспадаркі–аграгарадок новыя Максімавічы, тут жыве некалькі соцень чалавек. Ёсць школа і ўсё неабходнае для жыцця. 

Але ўсё ж адна з праблем гаспадаркі ў глыбінцы – моладзь, якая з’язджае з вёскі. Выхад знаходзяць у новай прадукцыйнай тэхніцы і сучасных эфектыўных тэхналогіях. Работнікаў менш, але прадукцыйнасць працы павышаецца. Сярэдні заробак у «Максімавічы-Агра»–каля 700 рублёў, усяго тут працуе 135 чалавек. А што тычыцца фермы, то яна яшчэ і дабудоўваецца. Гэта цяжка, але ўсё ж неабходна.  Раней будавалі за крэдыты, цяпер у гаспадарцы імкнуцца рабіць гэта за ўласныя сродкі. Каб ісці наперад, нягледзячы ні на што.

ТРК «Магілёў»

Пры выкарыстанні матэрыялаў актыўная гіперспасылка на mogilev-region.gov.by абавязковая