У Магілёўскім раёне стартаваў прафілактычны праект «Здароўе ў сяло»

Шырокамаштабны прафілактычны праект «Здароўе ў сяло» стартаваў у Магілёўскім раёне. Пра гэта паведамілі ў аддзяленні інфармацыйнага забеспячэння і здаровага ладу жыцця Магілёўскага занальнага цэнтра гігіены і эпідэміялогіі, які з’яўляецца арганізатарам акцыі.

Першым населеным пунктам, які прыняў акцыю, стаў аграгарадок Усход. Мерапрыемства прайшло на базе ААТ «Агракамбінат “Усход”». Усе жадаючыя змаглі памераць артэрыяльны ціск, узровень халестэрыну і глюкозы ў крыві, зрабіць электракардыяграму сэрца, вызначыць склад масы цела, атрымаць кансультацыі спецыялістаў па здаровым харчаванні, прафілактыцы цукровага дыябету, пытаннях фактараў рызыкі сардэчна-сасудзістых захворванняў.

За час правядзення акцыі ў двух удзельнікаў спецыялісты выявілі перавышэнне ўзроўню глюкозы ў крыві, у 10% – павышаны ціск, 50% – залішнюю масу цела. Іх накіравалі на кансультацыю да вузкіх спецыялістаў.

«Праект «Здароўе ў сяло» плануецца арганізоўваць штомесяц у розных населеных пунктах Магілёўскага раёна, – падкрэслілі суразмоўцы. – Наступная акцыя адбудзецца ў верасні. Цяпер вызначаемся з месцам правядзення мерапрыемства».