У Магілёве 26 студзеня арганізуюць «Гарачы фэст»

У Магілёве 26 студзеня арганізуюць «Гарачы фэст». Мерапрыемства пройдзе ў этнаграфічным комплексе «Зялёны гай» з 14.00 да 20.00, паведамілі карэспандэнту сайта ў цэнтры гарадскіх ініцыятыў.

Паводле слоў суразмоўцаў, сумесны з грамадскім аб’яднаннем магілёўскіх рамеснікаў «Шчырая майстэрня» фестываль прысвецяць разнастайным спосабам сагрэву ў зімовыя халады. Праграма свята будзе яркай і насычанай. Гасцей чакаюць займальныя гульні і конкурсы, танцы, народная і сучасная музыка, снежныя і спартыўныя забавы, абрады, варажба, майстар-класы, продаж сувеніраў, арыгінальныя фотазоны, а таксама традыцыйныя гарачыя напоі і смачны пачастунак. Наведвальнікі хутара пазнаёмяцца з побытам і традыцыямі беларускага народа, атрымаюць мора пазітыўных эмоцый.

«Гарачы фэст» становіцца добрай традыцыяй, – адзначыў кіраўнік Цэнтра гарадскіх ініцыятыў Юрый Стукалаў. – У мінулым годзе мерапрыемства прайшло ўпершыню, і мы спадзяёмся ладзіць гэтае выдатнае свята штогод. Нам удалося зрабіць яго пазітыўным і запамінальным, а галоўнае – утульным і нефармальным. Людзі весяляцца, спяваюць, танчаць, фатаграфуюцца, з задавальненнем удзельнічаюць у конкурсах і майстар-класах. Многія прыходзяць цэлымі сем’ямі. Атмасфера па-сапраўднаму цёплая дзякуючы жывым зносінам і творчай энергіі. Мы пастараемся захаваць радасны, сонечны і бадзёры дух свята».

Колькасць удзельнікаў абмежаваная, таму жадаючыя наведаць «Гарачы фэст» павінны прайсці рэгістрацыю па спасылцы. Прычым адзін чалавек можа зарэгістраваць цэлую кампанію да 6 чалавек. «Раім не адкладваць запаўненне формы. Як толькі збярэцца максімальна магчымая колькасць удзельнікаў, рэгістрацыя будзе скончана», – падкрэсліў Юрый Стукалаў.

Жадаючыя далучыцца да каманды «Гарачага фэсту» ў якасці валанцёра, удзельніка конкурсу, артыста, спонсара ці ў іншай ролі могуць напісаць арганізатарам (e-mail: cgimogilev@gmail.com).