5 пажараў адбылося за выхадныя ў вобласці, адзін ледзь не скончыўся гібеллю. Пра гэта паведаміла старшы інспектар абласнога ўпраўлення МНС Вольга Нехарошых.

«У суботу, 30 мая, каля 5 гадзін раніцы жыхары трохкватэрнага жылога дома па вул. Яцыны ў Магілёве прачнуліся ад з’едлівага паху дыму. Гаспадар адной кватэр выклікаў ратавальнікаў: гарэла трохпакаёвая кватэра, якая належыць 57-гадоваму магілёўцу. Яго ў непрытомным стане знайшлі на падлозе ў адным з пакояў. Выратаваны з дыягназам «атручэнне прадуктамі гарэння», у цяжкім стане шпіталізаваны. У выніку пажару ў пакоі пашкоджана маёмасць, закураны сцены і столь у кватэры. Іншыя кватэры не пашкоджаны, эвакуацыя жыхароў не праводзілася. Паводле папярэдніх даных, справакаваць узнікненне пажару магла непатушаная цыгарэта», – расказала Вольга Нехарошых.

Са слоў суразмоўніцы, першы дзень лета ў Магілёве пачаўся з гарэння смеццевага кантэйнера. Каля 5 гадзін раніцы загарэўся пластыкавы смеццевы кантэйнер па б-ры Юбілейным. Агонь цалкам знішчыў кантэйнер. Меркаваная прычына пажару – неасцярожнае абыходжанне з агнём, вінаватыя асобы ўстанаўліваюцца.