Абласное ўпраўленне МНС узначаліў Дзмітрый Голубеў

Новы кіраўнік Магілёўскага абласнога ўпраўлення МНС Дзмітрый Голубеў прадстаўлены сёння працоўнаму калектыву, ён змяніў на пасадзе палкоўніка ўнутранай службы Сяргея Дзямідава, які ўзначальваў УМНС рэгіёну з 2019 года. Ва ўрачыстым сходзе з нагоды заканчэння працоўнай дзейнасці начальніка абласнога ўпраўлення МНС і прадстаўлення новага кіраўніка ўпраўлення прыняў удзел старшыня аблвыканкама Анатоль Ісачанка, а таксама памочнік Прэзідэнта - інспектар па Магілёўскай вобласці Леанід Мартынюк, міністр па надзвычайных сітуацыях Рэспублікі Беларусь генерал-маёр унутранай службы Вадзім Сіняўскі. прадстаўнікі сілавых структур і ведамстваў, асабовы склад абласнога ўпраўлення МНС, кіраўнікі структурных падраздзяленняў аблвыканкама.

Загадам Міністэрства па надзвычайных сітуацыях Сяргей Дзямідаў звольнены ў запас па ўзросце. На яго адрас сёння прагучалі словы ўдзячнасці. Таксама за прафесіяналізм, ініцыятыву і аператыўнасць, праяўленыя пры вырашэнні ўскладзеных задач, добрасумленнае выкананне службовых абавязкаў, за шматгадовую службу і значны асабісты ўклад у папярэджанне надзвычайных сітуацый прыроднага і тэхнагеннага характару ён адзначаны Ганаровай граматай Міністэрства па надзвычайных сітуацыях.

«У першую чаргу, хачу выказаць Сяргею Дзямідаву словы ўдзячнасці за шматгадовую плённую службу на карысць людзей, нашай краіны, - адзначыў Вадзім Сіняўскі. - Дастаткова працяглы час ён кіраваў упраўленнем па Магілёўскай вобласці. Калісьці пачаўшы ваенную кар'еру курсантам інжынерна-касмічнай Чырванасцяжнай акадэміі ім. А.Ф.Мажайскага, вярнуўся ў родную Беларусь і заняўся выратавальнай справай».

Міністр падкрэсліў, што Сяргей Дзямідаў дастойна прайшоў свой шлях і быў верны выбранай справе, аддадзенай прысязе. Таксама ён даў пажаданне новаму кіраўніку ўпраўлення палкоўніку ўнутранай службы Дзмітрыю Голубеву, уручаючы яму службовае пасведчанне. Як адзначыў міністр, увагу трэба звярнуць на супрацьпажарную бяспеку і папярэджанне гібелі людзей на пажарах. «Пераважна надзвычайныя сітуацыі з агнём прыпадаюць на сельскую мясцовасць і 70-75% з іх узнікаюць з-за неасцярожнага абыходжання з агнём, курэння ў ложку. На гэта і трэба, у першую чаргу, звярнуць увагу новаму кіраўніку».

Таксама Вадзім Сіняўскі пажадаў Дзмітрыю Голубеву ўзаемаразумення з калектывам, належнага ўзаемадзеяння з іншымі ведамствамі і службамі, з якімі трэба супрацоўнічаць, і поспехаў у служэнні айчыне.

Раней Дзмітрый Голубеў займаў пасаду начальніка Магілёўскага гарадскога аддзела па надзвычайных сітуацыях. Ураджэнец Магілёва, у 1997 годзе ён скончыў Магілёўскі машынабудаўнічы інстытут і паступіў на службу пажарнікам у пажарную часць № 87 Магілёўскага завода транспартнага машынабудавання, а з 1998 года па 2011 год развіваўся, працуючы на розных пасадах у дзяржаўным пажарным наглядзе. У 2004 годзе скончыў Камандна-інжынерны інстытут Міністэрства па надзвычайных сітуацыях Рэспублікі Беларусь. А ў 2011 прызначаны начальнікам Магілёўскага гарадскога аддзела па надзвычайных сітуацыях. Мае дзяржаўныя ўзнагароды: медаль «За бездакорную службу» ўсіх ступеней; медаль «За адзнаку ў папярэджанні і ліквідацыі надзвычайных сітуацый».

Анатоль Ісачанка таксама падзякаваў Сяргею Дзямідаву за сумесную работу і падкрэсліў, што Магілёўшчына - дабрадатны край і службай тут можна ганарыцца. Новаму кіраўніку ён пажадаў, каб колькасць пажараў зніжалася, і абстаноўка ў рэгіёне заўсёды была спрыяльнай.

Юлія Таранава, фота аўтара