Алег Дзячэнка: новы праект Канстытуцыі прасякнуты клопатам аб дабрабыце беларусаў, аб росквіце і ўмацаванні Радзімы

Пра гэта член Пастаяннай камісіі па адукацыі, навуцы, культуры і сацыяльным развіцці Савета Рэспублікі Нацыянальнага сходу Алег Дзячэнка расказаў карэспандэнту sb.by. Парламентарый удакладніў, што ў цэнтры ўвагі застаецца дабрабыт грамадзян, зацвярджэнне правоў і свабод чалавека і грамадзяніна, прававой дзяржавы і сацыяльна справядлівага грамадства:

– Так, у прэамбуле Асноўнага закона выкладзены прынцыповыя палажэнні, якія вызначаюць неад’емнае права народа Беларусі на самавызначэнне, на захаванне нацыянальнай самабытнасці і суверэнітэту, шматвяковай гісторыі развіцця беларускай дзяржаўнасці, культурных і духоўных традыцый, народаўладдзя, незалежнасці і росквіту Рэспублікі Беларусь.

Па словах Алега Дзячэнкі, зацікаўленае і дзелавое абмеркаванне праекта Канстытуцыі ідзе ўжо другі тыдзень, прычым не толькі на дыялогавых пляцоўках, у сродках масавай інфармацыі або ў працоўных калектывах.

– Сапраўды ўсенароднае абмеркаванне разгарнулася сёння ў сацыяльных сетках, дзе выказваюцца самыя розныя, часта палярныя меркаванні аб прапанаваных зменах і дапаўненнях, – дапоўніў парламентарый. – Гэта яшчэ адно пераканаўчае сведчанне перамогі ідэй беларускай дэмакратыі. Найбольш каштоўныя прапановы, дапаўненні і папраўкі, якія атрыманы ў ходзе ўсенароднага абмеркавання і ўзбагачаюць найважнейшы дакумент нашай краіны, будуць абагульнены і ў далейшым знойдуць адлюстраванне ў канчатковым варыянце праекта Канстытуцыі.

 СБ