Аляксандр Лукашэнка аб заканчэнні навучальнага года і ўступнай кампаніі: непатрэбных паслабленняў быць не павінна

Прэзідэнт Беларусі Аляксандр Лукашэнка прыняў з дакладам віцэ-прэм’ера Ігара Петрышэнку і міністра адукацыі Ігара Карпенку.

Кіраўнік дзяржавы падкрэсліў, што ніякія праблемы ў эканоміцы і, тым больш, ніякія вірусы не адмяняюць актуальнай тэмы, якая ляжыць у сферы адукацыі дзяцей і рашэнняў у гэтым плане.

У цэнтры ўвагі былі тры тэмы – заканчэнне навучальнага года ў сістэме адукацыі, уступная кампанія і экзамены, летняе аздараўленне і адпачынак дзяцей. «На пытанні па гэтых тэмах цяпер трэба даваць адказ», – заявіў беларускі лідар.

«Хацеў бы пачуць ваш пункт гледжання, што будзем рабіць і як будзем працаваць. У нас жа экзамены ў 9-х і 11-х класах, затым у ВНУ заканчэнне навучальнага года, уступныя экзамены. Нам трэба зыходзіць з таго, як развівалася сітуацыя ў Беларусі і якія меры прымаліся і мною, і іншымі органамі ўлады ў сувязі з гэтай пандэміяй і віруснымі праблемамі. Рашэнні будуць выключна зыходзіць з таго, як развіваліся гэтыя падзеі. А не так, як робяць нашы суседзі. Мы не жылі так, як жылі нашы суседзі. Мы нічога не забаранялі, мы адкрыта і сумленна казалі людзям, як трэба жыць і працаваць», – адзначыў Прэзідэнт.

«Таму з гэтага будзем зыходзіць. Ніякіх непатрэбных паслабленняў быць не павінна. Для таго каб вучыцца ў ВНУ, патрэбныя веды. Веды на стол – паступай у ВНУ. Калі гэта школа, давайце вызначымся, як мы будзем праводзіць там выпускныя экзамены па заканчэнні 9-х і 11-х класаў. Я гатовы выслухаць вашы прапановы для прыняцця адпаведнага рашэння», – заявіў кіраўнік дзяржавы.

Ігар Карпенка далажыў, што на сённяшні момант школы ў сярэднім наведваюць 41% навучэнцаў. «Гэта ў першую змену. Па-рознаму развіваюцца падзеі ў розных рэгіёнах. Асабліва ў сельскай мясцовасці – там значна больш школьнікаў на занятках. І мы выбудоўваем адукацыйны працэс такім чынам, каб не страціць якасць адукацыі. Натуральна, стаіць пытанне, як атэставаць школьнікаў», – сказаў міністр.

БЕЛТА