Анатоль Ісачанка: моладзь – гэта апора дзяржавы і наша будучыня, у працы з ёю важны адкрыты і сумленны дыялог

Абласны форум маладых спецыялістаў, якія атрымалі ў 2021 годзе першае працоўнае месца ў Магілёўскай вобласці, прайшоў у аблвыканкаме. У ім прынялі ўдзел каля 130 прадстаўнікоў аграпрамысловага комплексу, сацыяльнай, вытворчай сфер і інш.

На форуме перад моладдзю выступілі прадстаўнікі ўпраўленняў і камітэтаў аблвыканкама, грамадскіх аб’яднанняў, маладзёжнага парламента, кіраўнікі буйных прамысловых і аграрных прадпрыемстваў рэгіёна. Сярод тэм: асноўныя напрамкі сацыяльнай абароны моладзі, мэты і прынцыпы фарміравання перспектыўнага кадравага рэзерву, грамадзянская салідарнасць моладзі як аснова для развіцця сацыяльнага і эканамічнага патэнцыялу рэгіёна, роля кіраўніка ў прафесійным росце маладых спецыялістаў. Прайшла і палітычная гадзіна, падчас якой удзельнікам расказалі аб гісторыі станаўлення і развіцця інстытута рэферэндуму і яго ролі ў сістэме народаўладдзя.

Адкрыты дыялог адбыўся ў моладзі са старшынёй Магілёўскага абласнога выканаўчага камітэта Анатолем Ісачанкам.

«Менавіта на такіх сустрэчах ёсць магчымасць абмеркаваць актуальныя тэмы, задаць хвалюючыя пытанні і атрымаць ад маладога пакалення зваротную сувязь, – адзначыў Анатоль Ісачанка. – Усе агучаныя прапановы будуць улічаны пры распрацоўцы праграмы развіцця Магілёўскай вобласці. У нашай дзяржаве робіцца вельмі шмат для моладзі. Часам нават у больш эканамічна паспяховых краінах такой падтрымкі ад дзяржавы моладзь не атрымлівае».

Старшыня аблвыканкама адзначыў, што важна вырасціць не проста адукаванага, але і выхаванага ў духу любові да сваёй Радзімы чалавека.

«Моладзь – гэта апора дзяржавы і наша будучыня. Таму такія сустрэчы патрэбныя і самае галоўнае, каб у іх не было фармалізму, каб быў адкрыты і сумленны дыялог. Каб задаваліся пытанні, нават далікатныя і, магчыма, не зусім прыемныя. Мы разам павінны абмяркоўваць развіццё свайго рэгіёна, сваёй краіны.

Перакананы, што малады чалавек новай фармацыі павінен умець адказваць сучасным выклікам, творча думаць, несці адказнасць за свае рашэнні і быць патрыётам».

Таксама Анатоль Ісачанка падкрэсліў, што ў краіне адзін з самых нізкіх узроўняў беспрацоўя сярод моладзі ў свеце, што асабліва важна сёння на фоне бясконцых лакдаўнаў і каранавіруснай істэрыі ў многіх краінах.

«Кожны з нас ганарыцца гэтымі вынікамі. Гэта заслуга нашай дзяржавы і той палітыкі, якая эфектыўна рэалізуецца ў рэспубліцы чвэрць стагоддзя, – падкрэсліў ён. – Яшчэ раз акцэнтую вашу ўвагу: для таго каб захаваць і прымножыць гэтыя вынікі, мы робім стаўку на моладзь».

Таксама старшыня аблвыканкама адзначыў, што на рынку працы сёння ўзрастае попыт на спецыялістаў рабочых прафесій, кадры высокай кваліфікацыі. І прадстаўнікі ўлады, кіраўнікі на месцах павінны мець зносіны з маладым пакаленнем больш актыўна, папулярызаваць такія спецыяльнасці, падымаць іх прэстыж. Маладых людзей ён таксама заклікаў смялей выказваць крэатыўныя думкі, выступаць з ініцыятывамі, дзяліцца свежым поглядам на вырашэнне тых ці іншых задач, накіраваных на росквіт Прыдняпроўскага краю і Беларусі ў цэлым.

У сваю чаргу, маладыя людзі цікавіліся ў Анатоля Ісачанкі яго планамі па развіцці рэгіёна, у тым ліку сельскагаспадарчага сектара, пыталіся пра перавагі ў атрыманні інфармацыі, сацыяльных сетках, задавалі пытанні аб размеркаванні і абавязковай адпрацоўцы і інш.

Ад маладых спецыялістаў са словам у адказ выступіла медсястра хірургічнага аддзялення Магілёўскай абласной дзіцячай бальніцы Ангеліна Караткевіч, якая расказала, што яе выбар прафесіі не быў выпадковым. І сёння яна рада, што яе мара ўвасобілася ў рэальнасць. А таксама ўдзячная калектыву, які заўсёды гатовы падзяліцца вопытам з маладымі спецыялістамі.

Дарэчы, у бягучым годзе сваё першае працоўнае месца ў Магілёўскай вобласці атрымала каля 5 тысяч маладых спецыялістаў.

Юлія Таранава, фота Галіны Гаўрыловіч